Андрей Назаров Русиянең Го федерациясе вәкилләре белән очрашты

- Без спортны үстерүгә зур игътибар бирәбез. Шулай ук бездә Го кебек уенны алга җибәрү белән кызыксынуыбызны белдерәбез. Го буенча беренче ачык турнирның Уфада, безнең уникаль Көрәш сараенда узуы безнең өчен зур дәрәҗә һәм җаваплылык. Бу энтузиастларның һәм федерациянең бердәм һәм инициативалы эше нәтиҗәсендә мөмкин булды, - диде Андрей Назаров.

Го Көнчыгышта билгеле һәм тарихта иң катлаулы стратегик уен булып санала. Республикада Го уенын үстерү мәгарифне, яшьләр сәясәтен, сәламәт яшәү рәвешен һәм халыкара партнерлыкны ныгытуны берләштерүче комплекслы юнәлеш буларак планлаштырыла. Иннокентий Дмитриев сөйләгәнчә, Русиянең Го федерациясенең әлеге стратегик уенны ил төбәкләрендә, шул исәптән Башкортстанда да популярлаштыру буенча планнары бар. Мәсәлән, 17-18 гыйнварда Башкортстан башкаласында Көрәш сараенда уен буенча беренче ачык турнир узачак.

- Планнарыбыз бик күп, һәм без әлеге интеллектуаль спорт төрен җитди рәвештә үстерергә телибез, 2026 елның җәендә Россия чемпионатын һәм Го буенча Русия Кубогы этабын уздырырга планлаштырабыз, - дип өстәде Иннокентий Дмитриев.

Очрашу азагында Башкортстан Премьер-министры Андрей Назаров төбәк Спорт министрлыгына республика территориясендә Го уенын тирәнтен интеграцияләргә, шулай ук әлеге юнәлешкә багышланган чараларны оештыруда һәрьяклап ярдәм күрсәтергә кушты. Республиканың тышкы икътисадый элемтәләр һәм конгресс эшчәнлеге министрлыгына Бөтенрусия конгрессын һәм Русия Кубогының финал этабын оештыру кысаларында Кытай белән хезмәттәшлекне көчәйтергә кушылды.

Фото: pravitelstvorb.ru