+17 °С
Облачно
Спорт
1 Августа , 16:25
Башкортостанда "Спартакиада народов России – 2026" старт алды
Бу – илнең төп спорт вакыйгаларының берсе. Ул яңа олимпия циклы өчен милли җыелма командаларны формалаштыруның мөһим этабы булып тора.
Башкортостанда "Спартакиада народов России – 2026" старт алды
Нәкъ менә монда Русиянең иң көчле спортчылары спартакиада медальләре өчен генә түгел, ә 2028 елда Лос-Анджелеста узачак Олимпия уеннарына әзерлек өчен илнең җыелма командасы составына керү мөмкинлеге өчен дә көрәшәләр.
Башкортстан берьюлы алты спорт төре буенча ярышлар кабул итә. Медальләр өчен көрәшкә беренчеләрдән булып триатлончылар һәм велосипед спорты (шоссе) вәкилләре керде.
Триатлон буенча ярышларда катнашучыларны Башкортстан Республикасы спорт министры урынбасары Артем Александрович Новиков сәламләде:
"Сезне Башкортстан Республикасы Премьер-министры урынбасары – Башкортстан Республикасы спорт министры Руслан Таһир улы Хәбибов һәм бөтен спорт җәмәгатьчелеге исеменнән сәламләвемә шатмын. Русия халыклары спартакиадасында катнашу сезнең һәрберегез өчен мөһим казаныш булуын телим. Спортта төп җиңү - беренче чиратта үз-үзеңне җиңү. Әлеге ярышлар безгә яңа рекордлар бүләк итәр, яңа исемнәр ачар һәм спортчылар өчен эре халыкара стартларда Русия намусы өчен чыгыш ясау юлында чираттагы адым булыр дип ышанам. Русия триатлон федерациясенә, Ксения Сергеевна Шойгуга, оештыручылар командасына һәм судьялар корпусына ярышларны югары дәрәҗәдә әзерләгәннәре өчен аерым рәхмәт сүзләре. Барыгызга да гадел көрәш, көчле хисләр телим, иң көчлесе җиңсен!»
Олимпия дистанциясендә хатын-кызлар арасында триатлон буенча ярышларда Мәскәү вәкиле Диана Исакова җиңү яулады. Шунысы игътибарга лаек, моннан дүрт ел элек узган Спартакиадада спортчы, Валентина Рясовадан калышып, көмеш призер булды. Быел ул пьедесталның иң югары баскычына күтәрелә алды.
Ир-егетләр арасында алтын медальне Михаил Бастраков яулады. Көмеш медаль иясе - Денис Колобродов, бронза медаль иясе - Павел Сорокин.
Фиништан соң Диана Исакова ярышларны оештыруны һәм трассадагы атмосфераны югары бәяләде. Аның сүзләренчә, трасса яхшы әзерләнгән, җанатарлар дә көч биргән.
Велосипед спорты (шоссе) буенча ярышларда да киеренке көрәш килеп чыкты. Спортчылар аерым старт белән шәхси узышта медальләр уйнаттылар, анда тизлек, чыдамлык һәм дистанциядә көчләрне дөрес бүлү хәлиткеч әһәмияткә ия иде.
Хатын-кызлар арасында Санкт-Петербург вәкиле Анастасия Семенова җиңүче булды. Көмеш медальне — Тамара Дронова (Мәскәү), бронза медальне Дарья Фомина (Самара өлкәсе) яулады.
Ир-егетләр арасында Савва Новиков (Мәскәү) җиңү яулады. Икенче урынны Кирилл Миллер (Самара өлкәсе) алды, өченче урында Виктор Бугаенко (Санкт-Петербург).
Беренче ярыш көне Башкортстанда "Спартакиада народов России"ның югары дәрәҗәдә оештырылуын һәм җанатарларның турнирга зур кызыксынуын раслады. Алда катнашучыларны фехтование, ачык суда йөзү, ишкәкле слалом һәм спорт көрәше буенча ярышлар көтә, алар шулай ук республиканың спорт объектларында узачак.
Фото: Илшат Әхмәтлв
