Барлык яңалыклар
Яшьлек
28 июль , 14:10

Студентлар ил буенча сәяхәт итә алачак

Башкортстанга да чит төбәк студентлары киләчәк.

Студентлар ил буенча сәяхәт итә алачак

15 июльдән Русия студентларының ил буйлап сәяхәт итү һәм югары уку йортлары кампусларында һәм тулай торакларында яшәү өчен уникаль мөмкинлек барлыкка килде. Студентлар туризмы программасы 25 августка кадәр гамәлдә булачак. Русия Фән һәм югары белем бирү министрлыгы тарафыннан Президент Владимир Путин йөкләмәсе буенча эшләнгән студентлар туризмы программасында туристик җәлеп итүчән 15 төбәктән 15 университет катнаша.

Башкортстанда фәнни-мәгариф һәм экологик туризм потенциалын үстерү «Яңа тормыш мохите» юнәлеше Евразия фәнни-белем бирү үзәге проектларын тәэмин итә. Үзәктә катнашучы буларак, Башкорт дәүләт университеты «Башкортстанны ачабыз» туристик маршрутын эшләде һәм программада катнашучы 15 университетның берсе булды. Югары уку йорты эшләгән маршрут 6 көн 5 төн дәвам итәчәк.

- Безнең бурыч - Башкортстанны башка төбәкләрдән килгән студентларга күрсәтү. Шуңа күрә без аларга республика табигатен күрсәтүдән тыш, урындагы халыкның мәдәниятен һәм көнкүрешен дә аңлый алсын өчен маршрут төзедек, - ди укыту-методик эш буенча проректор Азат Галимханов.

Университет кунакларны уникаль республика табигате белән таныштырачак. Русиянең башка төбәкләреннән сәяхәтчеләр күлләр, шарлавыклар һәм мәгарәләрне күрәчәк, "океан"га, дөресрәге, берничә миллион ел элек барлыкка килгән урынга - Шихан һәм Айгир тауларына менәчәк. Кыяга менгәч, 379 метрлы биеклектән көньяк Уралның матур табигатен күрәчәкләр, урындагы риваятьләрне ишетәчәкләр. Шулай ук маршрутта Уфа белән танышу һәм шәһәрнең әһәмиятле урыннарында җәяү йөрү планлаштырылган. Гидлар сыйфатында университетның туристлык клубы вәкилләре чыгыш ясаячак.

Фото: pravitelstvorb.ru

Автор:Гөлия Мөгаллимова