«Мин — профессионал» олимпиадасының йомгаклау этаплары Уфада узачак

Абруйлы интеллектуаль ярышларда җиңүчеләрне илнең әйдәп баручы югары уку йортлары магистратурасына һәм аспирантурасына кергәндә ташламалар, шулай ук эре компанияләрдә стажировка узу мөмкинлеге, 300 000 сумга кадәр акчалата приз һәм башка бүләкләр көтә.

Олимпиаданың бу сезондагы 71 юнәлешеннән җидесе Уфа Фән һәм технологияләр университетында гамәлгә ашырыла. Биотехнология, геология, экология һәм психология буенча йомгаклау этаплары 15 һәм 16 февральдә узды. Математика һәм физика буенча - 22-23 мартта, математик модельләштерү буенча-апрель уртасында булачак.

Биотехнология, геология, экология һәм психология буенча олимпиаданың йомгаклау этабын Томск дәүләт университеты оештыра, ул Табигать һәм кеше институты, УУНиТның Гуманитар һәм социаль фәннәр институты белән берлектә ярышларны уздыруны координацияли. Бу юнәлешләрдә бөтен илдән 300гә якын кеше катнашыр дип көтелә: 60 – биотехнология, 50 – геология, 80-экология буенча, һәм 120 бала психология буенча компетенцияләрен раслаячак.

– Без бу мөһим белем бирү вакыйгасының бер өлеше булуга һәм студентларга үз белемнәрен һәм талантларын күрсәтергә, шулай ук һөнәри бергәлек тарафыннан танылу һәм ярдәм алырга мөмкинлек бирүгә шатбыз, - ди УУНиТ ректоры Вадим Захаров. - Биремнәр җитди, тирәнтен белем һәм практик күнекмәләр таләп итә торган булачак. Әйтик, биотехнология һәм экология буенча биремнәрне чишүгә - 180, геология буенча 240 минут биреләчәк. Олимпиада студентларның белемнәрен һәм гамәли күнекмәләрен тикшерү өчен масштаблы платформа булып тора.

Фото: pravitelstvorb.ru