Син бит Илешнең улы...

Сөн елгасында коенып, Илеш икмәген ашап үскән егетнең ике тугандаш республиканың да танылган шагыйренә әйләнеп, күп мәртәбәләргә ирешүе — безнең өчен зур горурлык. Якташыбызның иҗатын өйрәнү, аны популярлаштыру максатында районыбызда ел саен төрле бәйгеләр үткәрелә. Бу бәйгеләрдә биш яшьлек сабыйлардан башлап, тугызынчы дистәне ваклап килүче абый-апаларга кадәр катнаша.
Быел да Роберт Мөгаллим улының 70 яшьлек күркәм юбилеен каршы алу уңаеннан, аның иҗатына багышлап, зур әдәби-иҗади бәйгеләр үтте. Балаларның иҗатка тартылуы безне аеруча нык шатландыра. Яз көне алар арасында “Кайттым туган якларыма” театрлаштырылган тамаша һәм шигырь уку, “Җырлыйм туган якта” — җыр, “Сөенсеннәр әле сабыйлар” рәсемнәр конкурсы игълан ителгән иде. Бәйгенең беренче этабы мәктәпләрдә үтсә, икенче этабы район Үзәк балалар модельле китапханәсендә барды. Биредә зур әзерлек белән үткән сайлап алу турында 200дән артык бала үз көчен сынады. Иң яхшы чыгыш ясаучылар конкурсның өченче этабына үтте. Аларга китапханәдәге “Роберт” лирик-патриотик клубында халык шагый­ренең үзе катнашлыгында барган бәйрәм кичәсендә чыгыш ясау бәхете тиде. Бәйге йомгаклары буенча җиңүчеләргә Роберт абый үз куллары белән бүләкләр тапшырды. Халык шагыйре кулыннан Диплом, Мактау грамотасы, Рәхмәт хатлары, китаплар алу, фәһемле сүзләр ишетү балалар өчен гомерлеккә истә кала торган вакыйга булды.
Район мәктәпләрендә еш булучы, ихлас күңеле, гадилеге белән аерылып торучы, күпмедер дәрәҗәдә “бала” булып кала белгән шагыйрь абыйлары белән һәр очрашу — балалар өчен олы бәйрәм. Якташ шагыйребезнең китапларын, шигырьләрен яратып укучылар арасында аның
ши­­­г­ырьләрендәге уңай геройлардан үрнәк алырга тырышучылар да күп. Конкурслар вакытында, хәтта шагыйрьнең үзенә охшарга тырышам дип, шигырь язучылар да булды. Бер бала менә ничек язган иде: “Әле менә сүзләр тезеп, утырам бик тә сабыр. Үскәч, Роберт абый кебек булам, диеп, зур шагыйрь”.
Быел “Бәхетле мизгелләр” (Казан) хәйрия фонды Роберт Миңнуллинның 70 яшьлек юбилее уңаеннан Татарстанның һәм Башкортстанның мәктәп укучылары арасында шагыйрьнең иҗаты буенча иң яхшы эссе/иншага бәйге оештырды. Шушы бәйгедә җиңү-челәр арасында Югары Яркәйнең 4нче урта мәктәбе укучылары да бар. Гәзит укучылар игътибарына аларның иҗади эшләреннән өзекләр тәкъдим итәм.



Югарыдагы мисаллардан кү­ренүенчә, Роберт Миңнуллинның шәхесе, аның шигырьләре – балалар өчен зур бер тәрбия мәктәбе ул.
Өлкәннәр өчен дә, нәниләр өчен дә бердәй талантлы әсәрләр язучы күренекле якташыбыз: “Һәр кайтуым туган җиргә булган мәхәб­бәтне кабат яңарта”, – дип кабатларга ярата. Без үзебез дә, илеш­леләр, аны яратып, һәрчак сагынып көтеп алабыз.
Юбилеегыз котлы булсын, хөрмәтле әдип! Сезгә киләчәктә дә туган туфрак җылысыннан көч алып, матур әсәрләр тудырып яшәргә язсын!

Зәлифә КАШАПОВА,
Русия һәм Башкортстан Язучылар, Журналистлар берлекләре әгъзасы.