Сабыйның киләчәге карында билгеләнә

— Район үзәк дәваха­нәсе­нең хатын-кызлар консульта­циясендә бүген 229 йөкле хатын-кыз исәптә тора. Аларда — азканлылык, бөерләр ялкынсынуы, җенси юл белән бирелүче авырулар еш күзә­телә. Әлеге авы­руларның килеп чыгышы, организмдагы тайпылышлар, гадәттә, дөрес тукланмаудан, сәламәт тормыш алып бармау­дан, эко­логиянең начар бу­луын­нан, үз сәламәтлегеңә бар­мак аша караудан килеп чыга. Бүген бик сирәкләр генә авырга узганчы ук табиб белән киңәшләшергә һәм тулы меди­цина тикше­ренүе үтәргә дә­ва­ханәгә килә.
Хатын-кыз исәпкә басу белән аның сәламәтлеген тик­шерү башлана. Башта йөкле хатын-кыз тулы медицина тик­шеренүе үтәргә һәм гомум анализлар тапшырырга җибә­релә. Йөк­лелеккә 12 атна булганда аларга Неф­текама шә­һәрендә урнашкан республика перинаталь үзәгендә югары сыйфатлы УЗИ үтү өчен юллама бирелә. Нәкъ шул чорда яралгыда хромосом тайпылышлар (мисалга, Даун синдромы һәм шуңа охшаш башка төр авырулар) барлыгы-юклыгы ачыклана. Йөклелек 18-21 һәм 32-33 атнага җиткәндә район дәва­ханәсенең үзендә янә бер тапкыр УЗИ үтелә. Берничә ел элек дәваха­нәгә КТГ( кардиотохография) аппараты алынды. Аның ярдәмендә ана карынындагы баланың йөрәк тибеше тикшерелә. Гомумән, йөкле хатын-кызны без бер генә минутка да игътибардан читтә калдырмаска тырышабыз. Моның өчен һәр атнада консилиумга җыелабыз. Анда акушер-гинекологлардан тыш, терапевтларны һәм педиатрларны да чакырабыз. Консилиум барышында атна дәва­мында кемнәр исәпкә басканлыгын, аларда нинди авырулар барлыгын ачыклыйбыз. Кирәк булган очракта, йөкле хатын-кызларны тар белгеч­ләргә, шулай ук Уфада һәм башка шә­­һәрләрдә урнашкан перинаталь үзәкләргә юллыйбыз. Шунысы куанычлы: йөкле хатын-кызларның күп­че­леге табиб әйткәннәрне тө­гәл үтәргә тырыша. Ләкин кайчагында бала туар алдыннан гына хатын-кызлар консуль­тациясенә исәпкә басучылар да очрап куя.
Беренче баланы 20-25 яшь аралыгында табарга кирәк, дип уйлыйм. Шуннан да соңга калырга ярамый. Дөрес, соңгы вакытта йөкле хатын-кызлар арасында өлкән яшьтәгеләр дә очраштыра. Мисалга, ике ел элек 46 яшьлек ханым бездә дүртенче баласын тудырды. Быел исә беренче баласын табарга җыенучы 42 яшьлек бер ханым исәпкә басты.
Авырлы хатын-кызларга мин күбрәк саф һавада йөрер­гә, сыйфатлы итеп тукланырга, гәүдә авырлыгын, гемоглобинны контрольдә тотарга, гимнастика ясарга, юк-барга борчылмаска һәм иң мөһиме — йөк­лелекне табиб күзәтүе астында үткәрергә киңәш итәр идем. Соңгысына аеруча басым ясавым юктан гына түгел. Бүген йөкле хатыннарның 10-15 проценты гына сау-сәламәт. Билгеле булуынча, сәламәт бала тик сәламәт анадан гына туа. Шуңа да организмда булган тайпылышларны вакытында ачыклау һәм дәвалау мөһим. Моңа ирешү өчен йөклелек кимендә унике атналык булганчы хатын-кызлар консультациясенә исәпкә басарга кирәк.