-14 °С
Болытлы
Гәзиткә язылуVKOKTelegramЯRus
Барлык яңалыклар
Сәламәтлек саклау
25 июнь 2015, 01:29

Ана назы могҗизага ия...

Әткәсе аларны ташлап киткән. Әнкәсе бу кайгыдан хәмер белән дуслашкан. Балигъ булмаган кызга еш кына кибеткә хәмер алырга йөгерергә, ачлы-туклы яшәргә, күпне күрергә һәм ишетергә туры килгән... Ә беркөнне әнкәсе аның күз алдында җан биргән. Балалар йортына ул шулай эләккән.

— Бездә дүрт кенә бала тулы ятим. Калганнарының я әтисе, я әнисе исән, алар — социаль ятимнәр, — ди Күгәр­чен районының Йомагуҗа балалар йорты медицина хезмәткәре Рәхимә Хисмәтуллина. – Авыр тормыш шартларыннан килгән балаларның берсен дә тулысынча сәламәт дип әйтеп булмый. Күбесендә неврологик авырулар, психикада тайпылыш булганнары да бар. Күз авырулары бик күп.
Чынлап та, сәламәт булмаган тормыш рәвеше алып барган ата-ана янында сәламәт бала үсәргә мөмкин­ме? Шикле. Рухы гарипләнгән кешенең тәне дә таза була алмый. Ә биредәге балалар йорты хезмәткәрләре иң башта аларның рухын сәламәтләндерү өчен бөтен көчен сала. Йөрәк җылысы, наз, яхшы тәрбия бирергә тырыша. Уңайлы яшәү шартлары, яхшы туклану булдырылган. Шулай да кайбер балаларда инде яхшы тәрбия белән генә төзәтеп булмаслык авырулар да бар. Мәсәлән, 6нчы сыйныфта укучы Русланның бер күзе юк... Җиде яшендә операция ясаганнар. Диагнозы – ретинобластома. Ягъни, онкология... Ул инде ике-өч тапкыр химиотерапия, нурланыш терапиясе алган. Руслан­ның икенче күзендә дә күрү сәләте на­чар­лана башлаган, аның сукыр калу куркынычы бар.
— Русланга югары технологияле медицина ярдәме кирәк. Сәламәтлек саклау министрлыгы аша квота рәсми­ләштердек, Мәскәүгә барачакбыз, — ди Рәхимә Абдрахман кызы. – “Изгелек” фонды ярдәм итәргә дә вәгъдә бирде.
Шулай, балалар йортының медицина хезмәткәре юлдан кайтып та керми диярлек. Биредә һәр балада ниндидер хроник авыру бар. Шуңа район поликлиникасына, хастаханәгә еш йөриләр. Әле бер белешмә юлларга кирәк, әле икенчесен... Ярый ла балалар йортының “ГАЗель” һәм җиңел машиналары бар.
— Әти-әниләре балалары янына киләме?
— Килгәннәре бар. Кайберләре, үз­ләреннән җаваплылык төшеп, бала­ларының сәламәтлеге белән дәүләт оешмасы шөгыльләнгәнгә шатланган да кебек, кайберләре бөтенләй кызык­сынмый... Әйткәндәй, алар бит ата-ана хокукларыннан юкка мәхрүм ител­мәгән. Балалар арасында бик яхшы укучылар да бар. Мәсәлән, шул ук Рус­ланның бер апасы — отличница, икенчесенең дә матур уңышлары җитәрлек...
— Балалар сәламәт булсын өчен нинди шартлар кирәк?
— Балага гомер биргән кеше­ләрнең җаваплылыгы, игътибары кирәк. Сабыйга тугач та яхшы тәрбия таләп ителә. Ә бу балалар нәни чакларыннан ук нәрсә генә күрмәгән! Биг­рәк тә әни кешеләрнең үз бурычларына җавап­сыз каравы җанны әрнетә. Кайбер әниләр: “Мине ирем ташлады, шул кай­гыны күтәрә алмыйча эчүгә бирелдем”, ди. Бу аклану түгел. Бала тап­кансың икән, бернинди сәбәп тә сине аңа игътибарсыз, начар мөнәсә­бәттә булырга этәрергә тиеш түгел.
Әйе, ана назы, яратуы авыруларны җиңә, могҗизалар тудыра ала. Дөньяга туган һәр сабый җылы мөнәсәбәт, мә­хәб­бәт тоеп, яхшы тәрбия күреп үссен иде.
Читайте нас в