Барлык яңалыклар
Сәламәтлек саклау
21 гыйнвар 2016, 02:00

Кеше органнарын трансплантацияләү — җитди мәсьәлә

Дәүләт җыелышы-Корылтайның чираттагы пленар утырышында беренче укуда “Башкортстан Республикасында гражданнар сәламәтлеген саклау турында” Башкортстан Республикасы Законына үзгәрешләр кертү турында” закон проекты каралачак. Ул Башкортстан Республикасы дәүләт власте органнарының һәм алар карамагындагы медицина оешмаларының кеше органнарын трансплантацияләү һәм донорлык өлкәсендәге вәкаләтләрен көйләячәк. Республика Законына үзгәрешләр “Русия Федерациясендә граж­дан­нар сәламәтлеген саклау нигезләре турында” Федераль законга узган елдагы үзгәрешләргә бәйле кертелә. Бу җәһәт­тән Башкортстан Республикасы Дәүләт җыелышы-Корыл­тай Рәисе Константин Толкачев түбәндәге аңлатма бирде.

— Узган елның җәендә Федераль закондагы һәм хәзер республика законындагы үзгәрешләр донорлык өлкәсендәге мәсьәләне цивилизацияле рәвештә хәл итүгә чираттагы адым булып тора. Федераль законга ярашлы, исән чагында язма рәвештә органнарын күчереп утыртуга каршы булуын белдермәгән һәркем потенциаль донор буларак карала ала. Әлбәттә, җәмгыятьтә әлеге норма бертөрле генә кабул ителми. Моның төп сәбәбе — донорлыкка бәйле хәл турында мәгълүмат җитмәүдә һәм әлеге мәсьәләнең никадәр кискен торуын аңлап бетермәүдә.

Ә Русия өчен трансплантацияләү проблемасы, чыннан да, бик актуаль булып кала. Органнарны трансплантацияләүгә чират артканнан-арта, мохтаҗ кешеләр аны еллар буе көтә. Элек моңа бәйле югары технологик ярдәм төбәктә яшәүчеләргә квоталар буенча федераль үзәкләрдә генә күрсәтелә иде. Хәзер исә республикада да органнарны трансплантацияләү мөмкинлеге туды. Әмма әлеге эшчәнлекне нәтиҗәле җайга салу өчен югары квалификацияле табиблар һәм заманча медицина корылмалары булу гына җитми, җәмгыятьнең моның мөһимлеген аңлап кабул итүе дә таләп ителә. Бу җәһәттән кемнеңдер гомерен саклап калу өчен мәрхүм булган кешедән аның органын күчереп утырту изге эш булуын тора-бара бөтен җәмгыять белән аңларбыз дип уйлыйм. Үз чиратында, депутатлар бу өлкәдәге законнарны камилләштереп, киңкүләм мәгълүмат чаралары халык арасында төпле, эзлекле аңлату эшләре алып барып, моның өчен ныклы җирлек әзерләргә тиешләр.
Читайте нас в