"Без үзебезнең казанышлар белән горурланабыз!..."

Башкортстан Хөкүмәте премьер-министры Андрей Назаров йогышлы авырулар госпитале турында язма бастырган.

"Минем инде берничә тапкыр язганым бар, Башкортстанда рекордлы 55 көн эчендә төзелгән йогышлы авырулар госпитале проектына башка төбәкләрдән килгән коллегаларыбыз тарафыннан ихтыяҗ зур. Русиянең уннан артык субъекты үз территориясендә безнең дәваханәне төзү белән кызыксынды. Чиләбедә төзелгән госпиталь ачык мисал булып тора. Яшермим, без хезмәттәшләребезгә концепция белән дә булыштык, һәм анда төзүчеләребез дә эшләде. Дөрес, алар аны 74 көн эчендә эшләде, ә без 55 көн эчендә төзедек. Күршеләрнең безнең проектны уңышлы тормышка ашыруы шатлыклы.

Мин архитектор Андрей Стариков җитәкчелегендәге «Арт-статус» компаниясенә тиз рәвештә госпитальнең проектын эшләгән өчен аерым рәхмәт белдерәсем килә.

Хәзер коронавирус таралу белән вәзгыять бик тә җитди. Зубоводагы безнең беренче госпиталь йөзләрчә кеше гомерен коткарырга мөмкинлек бирде, һәм хәзерге вакытта тулысынча тулган. Хәзер икенчене Стәрлетамакта төзибез. Төзелеш вакыты - 50 көн. Планканы тагын да югарырак күтәрәбез. Иң мөһиме, дәваханәдә табибларның барлык теләкләрен исәпкә алдык, шуңа күрә аны күпфункцияле итеп эшлибез. Анда операция, бала тудыру, балалар һәм тәрбиягә алу бүлекләре каралачак. Күз алдыгызга китерегез: ике айдан азрак вакыт эчендә без югары технологияле, техниканың соңгы казанышлары буенча җиһазландырылган медицина учреждениесе төзибез, аның аналоглары, мөгаен, бөтен дөньяда юктыр. Бинаның тышкы кыяфәте һәм территорияне төзекләндерү күзлегеннән дә каралачак ул. Без барысын да исәпкә алдык, вак-төяккә кадәр.

Гомумән алганда, 1 декабрьдә без Стәрлетамакта яңа инфекция үзәген эшләтеп җибәрәбез. Арытаба барысын да сөйләрбез һәм күрсәтербез.

Кабатлап әйтәм, без үзебезнең казанышларыбыз белән горурланабыз һәм аның уңышлы булуын бик телибез", - дип язган ул.