Табиблар тораклы булды

Бакалы районында дәүләт программаларыннан нәтиҗәле файдаланалар.

Район төрле дәрҗәдәге дүләт программаларында актив катнаша. Шулар нигезендә көнүзәк социаль мәсьәлә­ләр нәтиҗәле хәл ителә. Әйтик, Бакалыда белгечләрне торак белән тәэмин итүгә җитди игътибар бирәләр. Мәсә­лән, соңгы вакытта район үзәк дәваханәсе табибларына тәгаенләнгән икешәр фатирлы ике йорт төзелеше тәмамлана.

Йортларны күтәрүгә акчаның күпче­ле­ген “Башкортстан Республикасы авыл террито-риялә­рен комплекслы үстерү” дәүләт программасында катнашып алдылар. Быел шушы максатта Бакалы районына 7 миллион 772 мең 44 сум бүленде. Шуның 5 миллион сумга якыны — федераль бюджеттан, 1 миллион 261 мең сумы — республика казнасыннан. Район бюджеты төзелешкә миллион ярым чамасы акча салды. Йортларны сафка кертүдә подряд оешмалары — “Комфорт”, “Фазенда” җәмгыять­ләре­нең хезмәт­кәрләре тырышлык салды.
Заманча проект белән салынган йортларга инженерлык челтәрләре үткәрел-де. Ел ахырына кадәр биредәге фатирларга район дәваханәсенең ике теш табибы, хирургы һәм кардиологы күчәчәк. Район хакимияте башлыгы Александр Андреев белде-рүенчә, үзәк район дәваханәсенә табибларны, авылларга фельдшерларны җәлеп итү, аларга шартлар тудыру юнәлешендә даими эш алып барыла. “Авыл табибы” программасы нигезендә, әйтик, районга эшкә килгән белгечләргә биш ел эш­лә­гәннән соң, 1 миллион сум акча түләнә. Шушы программа гамәлгә кергәннән соң 9 ел дәвамында Бакалы районына 35 табиб килгән, шуларның 19ы язмышын район белән бәйләде.
“Авыл фельдшеры” программасы кысаларында Иске Шәрәшле, Киләй, На­гайбәк, Иске Катай, Иске Әҗми, Старогусево ФАПлары белгечләренә 500 мең сум акча бирелде. Шулай ук районда медицина хезмәткәрләренә торак сатып алу, яки төзү өчен субсидияләр бүленә.

Миләүшә РИЯНОВА.
Бакалы районы.