Иң зур бәя – ихлас рәхмәт сүзләре

Рита Мәҗит кызы чыгышы белән Яңа Бикмәт авылыннан. Мәктәптән соң Свердловск шә­һәре медицина училищесында укый, диплом алгач, эшкә туган районына кайта. Чалкак авылы участок дәваха­нәсендә хезмәт юлын башлый. Хәзер инде аның биредә эшләвенә 34 елдан артык вакыт үтеп киткән.
— Чалкак участок дәваханәсе бүген табиблык амбулатория­се­нә әверелде, хәзер инде би­редә ике генә кеше эшлибез, — дип уртаклашты Рита Мәҗит кызы. — Минем уң кулым, яр­дәмчем, шәфкать туташы Гөл­зилә Бадыйкова белән авыруларны кабул итәбез, кирәк икән, йортларына барып медицина ярдәме күрсә­тәбез, дару алып кайтабыз, мәк­тәпкә барып, календарьга кертел­гән прививкаларны ясыйбыз. Авыруларга система куяр өчен махсус җи­һазланган бүлмәбез бар. Кирәк икән, анализлар да алабыз. Коронавирус инфекция­сенә каршы иммунлаштыру кампаниясен яхшы нәтиҗәләр белән үткәр­дек.
Чалкак авыл хакимияте башлыгы Ришат Нигъмәтҗанов Рита Мәҗит кызының эшенә югары бәя бирде.
— Рита Галәветдинова — үз эше­нең чын остасы. Ягымлы мө­гамәләсе белән яше-карты­ның ихтирамын яулаган кеше. Көн дими, төн дими, ярдәмгә мохтаҗ­лар янына ашыга. Ә кулы бик җиңел, шифалы аның: укол кадаса, яки система куйса, авыруың тиз арада сыпырып алгандай югала, — диде ул. — Рита апаның тормыш юлдашы Илмир Зыя улы да амбулато­риядә эшли, ул би­редәге газ казанлыгы операторы. Авыруларга ашыгыч медицина ярдәме күрсәтергә кирәк бул­ганда, руль артына утырып, тормыш юлдашын тиз генә кирәкле адрес буенча алып бара. Менә шулай бергәләп эшли алар. Өч кыз үс­терделәр, аларның икесе, әнисе сукмагыннан китеп, медицина тармагында хезмәт салалар.

Миләүшә ЛАТЫЙПОВА,
“Кызыл таң”ның үз хәбәрчесе.
Борай районы.

Фото: М.Латыйпова