Авыручылар саны кими, ләкин пандемия бетми әле

Русия төбәкләренең яртысына якыны, коронавирус буенча эпидемиологик хәл яхшыру сәбәпле, медицина тикшеренү­ләре һәм диспансерлау үткәрүгә чикләүләрне гамәлдән чыгарырга карар итте. Әмма, инфекционист Евгений Тимаков сүзләренчә, коронавирус пандемиясе ике-өч елдан да иртәрәк бетмәячәк, чөнки кешеләрнең тулы иммунитеты шул вакыттан соң гына формалашачак, дип хәбәр итә ТАСС.

COVID-19дан вакциналанырга әзер­ләнгәндә һәм прививкадан соң русиялеләр нинди хаталарга юл куя? Бу хакта Sputnik радиосына югары категорияле табиб-терапевт Алексей Водовозов аңлатма бирде.
Кайбер кешеләр, коронавирус инфекция­сеннән прививканы ясатырга әзерләнеп, Интернетта бирелгән киңәш­ләргә таяна һәм, нәтиҗәдә, хаталар ясый, дип билгели ул. Аерым алганда, алар вакцина ясату яки ревакциналау алдыннан канны сыекландыручы препаратлар кабул итә башлый.
“Канны сыеклаучы препаратларны күрсәтмә­ләрсез кабул итәргә ярамый. Бу, ни дисәң дә, “авыр артиллерия”, табиб кына билгели торган препаратлар, белгеч аларны кандагы күрсәт­кечләрнең үзгәрүен күзәтеп кенә билгели. Бу препаратлар — табиб кулында яхшы инструментарий, әмма аларның катлаулылыклары да бик күп”, — дип ассызыклый Алексей Водовозов.
Белгеч сүзләренә караганда, COVID-19дан прививкага ниндидер аерым әзерлек кирәк түгел. “Иң мөһиме — алкогольне чамасыз кулланмау һәм вакциналауны яки ревакциналануны “оптималь формада” үтү өчен артык арыганлыкны, талчыгуны булдырмау”, — дип ачыклык кертә табиб.
“Спиртлы эчемлекләрне артык кулланмау зарур, чөнки бу безнең иммунитетка нык суга. Вакциналану алдыннан йокыны туйдырырга, физик яки акыл эшчәнлеге буенча зур йөк­ләнеш кичермәскә ки­рәк”, — дип киңәш итә Алексей Водовозов.
Икенче киң таралган ялгышу – кайбер пациентлар антигистамин һәм температура төше­рүче препаратлардан баш тарта, гәрчә хәл торышлары моны таләп итсә дә. Алар дарулар вак­цинаның нәтиҗәсен ки­метәчәк, дип уйлый.
“Кайчагында кеше, әйтик, аллергия реакция­ләренә дучар була, аның укол урыны шешә яки кычыта, тик ул антигистаминлы препарат эчсәм, вакцина тиешле нәтиҗә бирмәячәк, дип уйлый. Бу алай түгел. Температура төшерү чараларына да кагыла бу — алар вакцинаның нәтиҗәлелегенә йогынты ясамый, шуңа күрә, әгәр хәл авырлашса, аларны кабул итүдән курыкмаска кирәк”, — дип аңлата Алексей Водовозов.