ФАПлар калкып торса, авыллар балкып тора!

Игнат авылында яңа пункт 2020 елның 14 октябреннән халыкны кабул итә башлаган. Биредә тәҗрибәле фельдшер Роза Туктарова эшли. Ул 1991 елның 1 апреленнән, 19 яшен­­­нән үк сәламәтлек саклау өлкә­сендә көч сала. Бу авыл пунктында — 15 ел. Моңа ка­дәр Күчем авылы ФАПында эшлә­гән. Игнатка килен булып төшкән Роза Рәис кызы. Ире Уфага йөреп эшли, слесарь. Ике кыз­­­лары инде буй җиткер­гән, өл­кәне — укытучы, ә кечесе әнисе һө­нә­рен сайлаган, медицина колледжын тәмам­лый. Өстә­венә, ашыгыч ярдәм хезмәтендә дә эшли, реабилитологка читтән торып белем дә ала.
Әйтергә кирәк, яңа ФАПта шатланып эшләрлек — барлык уңайлык­лар бар, җиһазлар китерелгән, шартлар тудырылган. Компьютер бар, Интернет үткәрелгән.
— Элекке пункт белән чагыштырсак, җир белән күк арасы инде! — ди Роза Туктарова. — Клубның бер бүлмәсендә эшлә­дек, суны үзебез ташыдык... Ә хәзер шартлар искиткеч. Су, җылылык бар, проце­дуралар, кабул итү, тикшеренү бүл­мәләре аерым җиһазлан­дырылган. Шу­ңа эшләве дә рәхәт. Ә авыл хал­кының ничек сөенгәнен күрсәгез!
Авылда 257 кеше яши. Алар­ның 40ы — балалар. ФАПта аларга беренчел медицина яр­дәме күрсәтелә, барлык тиешле прививкалар ясала, күзәтү алып барыла. Фельд­шер әй­түен­чә, аена бер тапкыр район дәва­ха­нәсеннән педиатр һәм терапевт килә. Ихтыяҗга карап, тар белгеч­ләрне дә чакырып торалар. Яңа туган балаларга патронаж оештырыл­ган, өлкән­нәргә диспансерлау да үткәрелә. Би­ре­­дә онкология авыруларын иртә ачыклау юнәлешендә дә эш алып барыла.
Фельдшер әйтүенчә, бүген халыкны күбрәк кан басымы авырулары борчый. Күпләр укол ясатырга йөри. Фельд­шерның гына көче җитмәгән очракларда кичектергесез ярдәм чакыртыла.
Коронавирус белән бәйле кискен чорны да лаеклы үткән­нәр биредә. Санитар-эпидемиологик кагый­дә­ләрне үтәүгә зур игътибар бүленгән. Әлбәттә, авыручылар булган, күпләр амбулатор дәваланган. Вакциналау оештырылган.
— Киләчәктә мондый куркыныч инфекцияләр килеп чыкмасын иде инде, яңа ФАПта тыныч кы­на, матур итеп эшләргә язсын иде, — ди авыл фельдшеры.