Репродуктив сәламәтлекне диспансерлау 12 меңгә якын авыруны ачыклаган

Ул репродуктив потенциалны вакытында ачыкларга, бәяләргә, ачыкланган патологияне дәваларга, йөклелеккә һәм бала тууга әзерләнергә мөмкинлек бирә.

- Демография өлкәсендә дәүләт сәясәте халыкны саклау принципларына нигезләнә. Очраклы түгел, ана һәм балаларны саклау, шулай ук гражданнарның репродуктив сәламәтлеген ныгыту «Гаилә» яңа федераль проектының төп юнәлешләренең берсе булды. Репродуктив сәламәтлекне диспансерлау программасы алты ел дәвамында гамәлдә булачак һәм 18 яшьтән 49 яшькә кадәрге өлкәннәрнең 30 процентын тикшерү мөмкинлеге бирәчәк, – дип билгеләп үтте Башкортстан Хөкүмәте Премьер-министры Андрей Назаров.

Репродуктив сәламәтлекне диспансерлау ике этапта үткәрелә. Беренчесендә пациентлар хәвеф факторларын ачыклау өчен анкеталау, шулай ук гинеколог һәм урологтан консультацияләр уза. Тайпылышлар ачыкланганда табиблар өстәмә тикшерү методларын билгелиләр.
Сәламәтлек саклау министры вазыйфаларын башкаручы Айрат Рәхмәтуллин билгеләп үткәнчә, ел башыннан диспансерлауның беренче этабын 413 476 пациент узган, икенче этабын – 66187. Репродуктив диспансерлау барышында 20,5 меңнән артык авыру очрагы теркәлгән, аларның 12 меңгә якыны беренче тапкыр ачыкланган. Алар арасында репродуктив яман шешнең - 22, җенси юл белән йога торган инфекцияләрнең 361 очрагы бар. Шулай итеп, репродуктив система патологиясе тирәнтен тикшерү узган һәр җиденче гражданинда ачыкланган.
Ачыкланган авыруларның барлык очраклары буенча диспансер күзәтүе оештырылган һәм дәвалау үткәрелә.

Андрей Назаров Сәламәтлек саклау, Гаилә, хезмәт һәм халыкны социаль яклау, Мәгариф һәм фән министрлыкларына һәм муниципалитетлар хакимиятләренә хезмәт һәм студентлар коллективлары арасында киңкүләм репродуктив диспансерлау үткәрү буенча көчләрне берләштерергә кушты.

Фото: https://pravitelstvorb.ru/news/25718/