Яңа хатын-кызлар консультацияләре төзелә

Бүген Башкортстан Башлыгы Радий Хәбиров үткәргән атналык оператив киңәшмәдә ана һәм бала сәламәтлеген саклау чаралары комплексын гамәлгә ашыру каралды.
Төбәкнең сәламәтлек саклау министры Айрат Рәхмәтуллин хәбәр иткәнчә, республикада 889 419 бала яши, аларның 90 проценттан артыгы профилактик тикшерүләр узган. Башкортстанның һәр дүртенче баласы шифаханә-курорт дәвалануы алган, 10 меңнән артык бала медицина тернәкләнүе узган. Шулай ук 2024 елда Республика медицина учреждениеләрендә 3 728 балага махсуслаштырылган һәм югары технологияле медицина ярдәме күрсәтелгән, ә 1 762 яшь кешене федераль үзәкләргә җибәргәннәр.

- Республикада иң катлаулы авыруларга ярдәм итүче сигез махсуслаштырылган балалар медицина үзәге ачылды. 2024 елның октябрендә ачылган «Салют» уникаль балалар тернәкләндерү комплексы мөмкинлекләре чикләнгән балаларга исәпләнгән. 2025 елга 1 770 балага медицина реабилитациясе планлаштырылган, – дип өстәде Айрат Рәхмәтуллин. - Республика балалар онкологиясе һәм гематологиясе үзәген файдалануга тапшыру белән онкология авырулы балаларга югары технологияле медицина ярдәме күләме 262 очракка кадәр артты, федераль үзәкләр белән телемедицина консультацияләре саны ике мәртәбә артты. Республикада беренче тапкыр сөяк миен күчереп утырту буенча өч операция башкарылды.

Авырлы хатыннарның һәм репродуктив яшьтәге хатын-кызларның сәламәтлеген саклау буенча чаралар арасында Сәламәтлек саклау министрлыгы җитәкчесе «Ачык бала тудыру йорты» һәм «Кайгыртучан хатын-кызлар консультациясе» проектларын, республика медицина мәгълүмати аналитика системасында хәвефләр белән идарә итү үзәге мөмкинлекләрен кулланып, бала табуда ярдәм итү хезмәтенең өч дәрәҗәле контролен, абортка кадәр консультацияләүне, ЭКОга аның нәтиҗәлелеген арттыру максатларында әзерлек системасын, диспансерлауны билгеләп үтте.

Репродуктив сәламәтлекне бәяләү өчен. 2025 елдан Башкортстанда «Гаилә» гомумдәүләт проекты кысаларында «Ана һәм балачакны саклау»төбәк проекты старт алган. Аны гамәлгә ашыруга 714,9 миллион сум каралган, шул исәптән федераль бюджет хисабына – 700,6 миллион сум.
Финанс чаралары, аерым алганда, дүрт модульле хатын-кызлар консультациясе төзелешенә, акушер-гинеколог табиблары кабинетларын сигез медицина оешмасында хатын-кызлар консультацияләренә үзгәртеп коруга юнәлдереләчәк.

Башкортстан Башлыгы билгеләп үткәнчә, ана һәм бала сәламәтлеген саклау – республикада социаль сәясәтнең төп бурычларыннан берсе.

- Өч елга Русия бюджеты параметрларын тулысынча формалаштыргач, без республиканың беренчел медицина буенча нинди гаризалар кабул итүләрен белербез - үзебезгә кирәк булганның барысын да тапшырдык. Әгәр гаризаларыбыз тулысынча канәгатьләндерелсә, бу бик шәп булачак, - диде Радий Хәбиров. - Хәзер без алты районда алты поликлиника төзибез, быел аларны тапшырырга тиешбез. Ә планнарда - медицина учреждениеләрен төзүне һәм җиһазландыруны дәвам итү.

Төбәк җитәкчесе шулай ук республика Сәламәтлек саклау министрлыгына Башкортстанда беренче тапкыр сөяк миен күчереп утырту буенча операция үткәргән медикларны бүләкләү өчен документлар әзерләргә кушты.

- Без балалар онкологиясе һәм гематологиясе үзәген ачканда, сөяк миен күчереп утырту буенча операцияләрне безнең табиблар да эшли башлавын теләдек. Без моңа ирештек, - дип йомгаклады Радий Хәбиров. - Бу эштә катнашкан медицина бригадаларын бүләкләүгә тәкъдим итегез. Бу медицинадагы вакыйга. Без табибларыбызга һичшиксез рәхмәт белдерәчәкбез.

Фото Башкортстан Башлыгы сайтыннан