+4 °С
Болытлы
Барлык яңалыклар
10
Сәламәтлек саклау
31 март , 20:11
Балалар хирургиясе бүлеге яңартылды
Нефтекама шәһәренең балалар хирургиясе бүлегендә тулысынча яңарту эшләре «ЛАКИ» хәйрия фонды тарафыннан, Нефтекама шәһәре депутатлары ярдәме белән тормышка ашырылды.
Балалар хирургиясе бүлеге яңартылды
Өч ай эчендә 600 м² мәйданлы бүлек тулысынча яңартылды. Монда ел саен 800дән артык бала дәвалана.
Ремонт барышында башкарылган эшләр:
Барлык инженерлык коммуникацияләре (электр үткәргечләр, су белән тәэмин итү) тулысынча алмаштырылды;
Заманча сантехника урнаштырылды;
Коридорларда «Армстронг» түшәмнәре ясалды, палаталарда яңа яктырту системасы урнаштырылды;
Яңа ишекләр куелды, мебель тулысынча яңартылды;
Идән капламнары алмаштырылды;
Стеналар штукатурланды һәм буялды.
Аерым игътибар балаларның уен бүлмәсе һәм коридорларның бизәлешенә бирелде – биредә «ЛАКИ» фонды символы булган аю рәсемнәре ясалды.
Моннан тыш, төбәк депутатлары хирургия бүлегендә дәваланучы балалар өчен китаплар, үсеш өчен уеннар һәм уенчыклар җыйды. Әлеге акциянең кураторы Корылтай депутаты Рөстәм Әхмәдинуров булды.
Рафаэль Зыятдинов, Нефтекама шәһәр хастаханәсе баш табибы:
“Моңа кадәр безнең бүлек бик искергән иде – капиталь ремонт озак еллар дәвамында уздырылмады. Диварлар тузган, санитар узеллардагы җиһазлар искергән – барысы да яңарту таләп итә иде. Хәзер исә безнең бүлек заманча стандартларга тулысынча туры килә. Ышанам, бу шартлар балаларның тизрәк савыгуына ярдәм итәчәк. Без Фондка бу мөмкинлекне булдырганнары һәм тулы масштаблы ремонт үткәргәннәре өчен бик рәхмәтле!”
Татьяна Есаулкова, «ЛАКИ» Хәйрия фонды президенты:
“Без чиксез шат, чөнки хәзер кечкенә пациентлар якты, заманча һәм чын мәгънәсендә уңайлы бүлектә дәваланачак! Өч ай эчендә без чын могҗиза тудырдык – 600 м² мәйданлы больница бүлеген тулысынча үзгәртеп кордык".
Белешмә:
«ЛАКИ» Хәйрия фонды 2024 елның 1 мартында ярдәмгә мохтаҗ балаларга булышу максатыннан оештырылган. Фонд, иң беренче чиратта, ятим балаларга аерым игътибар бирә. Оешманың төп максаты – Русиядәге балаларга мәхәббәт, кайгырту, җылылык һәм яклау хисен тою мөмкинлеген булдыру.
Читайте нас: