Җиһазлар кайтып тора, ФАПлар да калкып тора!

Ел башыннан Баш­корт­станның 45 медицина оешмасы “Озайлы һәм актив тормыш” гомумдәүләт проекты ярдәмендә 55 күчмә рентген-аппарат алган. Бу хакта төбәкнең Сәламәтлек саклау министрлыгында хәбәр иттеләр.  

Ведомствода ачыклык кертү­ләренчә, әлеге рентген-аппарат­ларның төп өстенлекләренең берсе — аз хәрәкәтләнүче пациентларны транспортлаусыз тикшерү мөмкин­леге. Бу бигрәк тә авырлык белән хәрәкәт итүче кешеләр һәм өлкән яшьтәгеләр өчен мөһим.

Яңа техника авыруларны иртә стадияләрдә ачыкларга һәм республика халкының медицина ярдәме алу мөм­кинлеген яхшыртырга мөмкинлек бирәчәк.
Быел “Башкортстанда сәламәт­лек саклауның беренчел звеносын модерни­зацияләү” төбәк программасын гамәлгә ашыру нәтиҗәсендә алты поликлиниканы файдалануга тапшыру көтелә. 134 берәмлек модульле конструкция сатып алу һәм урнаштыру, тугыз объектка капиталь ремонт ясау, шулай ук 4,5 мең берәмлектән артык җиһаз һәм 99 берәмлек автотранспорт сатып алу планлаштырыла.
Шулай ук “Озайлы һәм актив тормыш” гомумдәүләт проекты кысаларында быел Кырмыскалы үзәк район дәваханәсенә — ике ультратавыш диагностикасы аппараты, Бакалы районы үзәк дәваханәсенә “Элепс” электрохирургия аппараты кайтарылды.

“Элепс” электрохирургия блогын урнаштыру сәламәтлек саклау өлкәсендә заманча таләпләргә мөһим адым булып тора, ул, һичшиксез, халыкка күрсәтелүче медицина хез­мәтләренең сыйфатын яхшыртачак.
— “Элепс” аппаратын электрохирургиядә кулланалар. Ул операцияләрне югары төгәллек һәм тукымаларга минималь зарар белән башкарырга мөмкинлек бирә. Бу пациентларның тизрәк тернәкләнүенә генә ярдәм итеп калмый, хирургия тыкшынуларыннан соң катлаулану куркынычын да киметә, — ди дәваханәнең баш табибы Зәбир Гыйздәтуллин.

“Озайлы һәм актив тормыш” гомумдәүләт проектының төп максаты — уртача гомер озынлыгын 2030 елга — 78, ә 2036 елга 81 яшькә кадәр арттыру.
Гомумдәүләт проекты ярдәмендә медицина учреж­дениеләре яңартыла, тер­нәкләндерү системасы ка­милләштерелә, тикшеренү үзәкләре челтәре үсеш ала, сәламәтлек саклауны санлаштыру буенча эш алып барыла. Яңартылган гомумдәүләт проектлары Русия Президенты Владимир Путин карары буенча 2025 елдан гамәлгә ашырыла.

Ләйсән Якупова.
Фото Башкортстанның Сәламәтлек саклау министрлыгыннан.