"Күпме яшисем калган?"

Татарстанның атказанган артисты, популяр җырчы Ләйсән Гыймаева онкология турында Зәмирә Рәҗәповага «Әй, язмыш, язмыш» тапшыруында сөйләде. Аның сүзләренчә, бәлки, кемгәдер бу тикшеренергә һәм диагноз турында вакытында белергә этәргеч булыр.

- Бер җирем дә авыртмады, бернәрсә дә борчымады. Мин танышымның сөт бизе яман шешеннән интегүен һәм Германиягә дәваланырга китүен белдем. Үземнең сәламәтлегем турында күңелемдә шик бар иде, шуңа күрә тикшеренеп карарга булдым. Моңа кадәр мин маммологның нинди табиб икәнен дә белми идем. Хатын-кызлар елына бер тапкыр бу белгечтә тикшерелергә кирәклеген белергә тиеш. Ни өчендер, бу хакта бала тудыру йортында да, гинекологлар да әйтми. Минем очракта да шулай булды. Миңа УЗИ ясадылар һәм онкологиягә охшаганлыгын әйттеләр. Мин ул чакта ышанмадым, һәм табиб мине тагын бер анализга җибәрде. Нәтиҗәләр 7-10 көннән соң гына булырга тиеш иде. Бу атнада минем бөтенләй йокым булмады, - дип уртаклаша Ләйсән Гыймаева.

Аның сүзләренә караганда, ул иренә — артист Булат Бәйрәмовка — онкологиягә шикләнүләре турында әйтмәгән, ләкин аңардан үзе белән анализ алырга һәм табибка керергә сораган. Табиб аларга "диагноз расланган" дип хәбәр иткәч, алар шок хәлендә калган.

- Кешеләр рак - хөкем карары дип уйлый. Берничә ел яшисем калды дип уйлыйсың. Мин табибтан үземә күпме калганын сорадым. Ул миңа: «Сез нәрсә, бу чир дәвалана, дарулар да, дәвалау ысуллары да бар», - диде, безгә нәрсә һәм ничек эшләргә икәнен язып бирде, — дип сөйләде ул. Ләйсән ире ягыннан көчле ярдәм булуын белдерде.

Шулай ук, җырчы билгеләп үткәнчә, халыкта, имезгән хатын-кыз сөт бизенең яман шеше белән авырмый, дигән ышану яши, әмма бу алай түгел. Ул вакыт-вакыт табибларда тикшерелергә киңәш итте. Артисткага хәзер мондый диагнозы булган йөзләгән кеше яза, ә ул, мөмкин булганча, һәркемгә җавап бирергә тырыша.

Фото: социаль челтәрдән.