БДМУда дөньяның әйдәүче белгечләре чыгыш ясый

Евразия фәнни-мәгариф үзәгенең вузара студентлар кампусы резиденты булган Башкорт дәүләт медицина университеты халыкара мәгариф киңлегендә үз позицияләрен ныгытуын дәвам итә.

Университетның чит ил студентлары өчен Мисыр, Нигерия һәм Көньяк Африка Республикасыннан чакырылган профессорлар катнашында лекцияләр циклы оештырылды. Вузара кампуста студентлар алдында чит илләрнең әйдәп баручы белгечләре чыгыш ясады.

Александрия медицина университетының (Мисыр) эндоурология һәм лапароскопия кафедрасы профессоры Мостафа Сәид чит ил студентлары белән гадәттән тыш хәлләр урологиясе өлкәсендәге тәҗрибәсе белән уртаклашты.

Абуджи университетыннан (Нигерия) урология бүлеге мөдире, хирург-уролог-консультант, профессор Осереман клиник хирургиядә нәтиҗәле аралашу компонентларына, шулай ук простата гиперплазиясе һәм простата яман шешен скрининглау, диагностикалау һәм дәвалау алымнарына багышланган чыгыш ясады.

Русия Сәламәтлек саклау министрлыгының Башкорт дәүләт медицина университеты дөньяның иң яхшы медицина практикаларын җәлеп итү үзәгенә әверелә. Университет заманча медицинаның иң актуаль юнәлешләре буенча тәҗрибә уртаклашу өчен ачык мәйданчык ролен үти.

Бүгенге көндә Башкорт дәүләт медицина университетында дөньяның 64 иленнән биш меңгә якын чит ил студенты белем ала. Ел саен югары уку йорты якын һәм ерак чит илләрдән чакырылган галимнәр катнашында эре халыкара фәнни-мәгариф чаралары оештыра. Бу студентларга университеттан чыкмыйча гына дөньякүләм экспертлардан актуаль белем алырга мөмкинлек бирә.