Безнең медиклар сынатмас!

Республика хезмәткәрләре Спартакиадасында Башкортстан медиклары янә призерлар рәтенә керде. Чарада 350дән артык катнашучы һәм 16 команда алты спорт дисциплинасында көч сынашты.

Узган ялларда Римма Баталова исемендәге стадионда Республика Профсоюзлар федерациясе оештырган Башкортстан хезмәткәрләренең җәйге спартакиадасы узды. Ярышларда җитештерү һәм социаль өлкә профсоюзларыннан 16 команда катнашты.

Үз төркемендә Республика Сәламәтлек саклау хезмәткәрләре профсоюзы командасы III урынны алды. Профсоюз командасы өчен бу инде республика ярышларында өченче тапкыр катнашу. Һәм өченче тапкыр медиклар республиканың иң көчле командалары белән көндәшлек итә алуларын раслады.

Спартакиада өстәл теннисы, армспорт, җиңел атлетика, гер күтәрү, аркан тартышу һәм гаилә стартлары буенча узды.

Өстәл теннисында профсоюз командасын медиклар арасында теннис буенча чемпионатта җиңүчеләр – Уфаның 13нче клиник дәваханәсеннән Семен Старновский һәм Ашыгыч медицина ярдәме клиник дәваханәсеннән Анна Ядренкина тәкъдим итте. Икесе өчен дә хезмәткәрләр Спартакиадасында бу беренче катнашу булды. Алар теннис белән даими шөгыльләнә. Нәтиҗәдә медиклар бронза медаль яулады.

Дүртөйле үзәк район дәваханәсенең стоматолог-ортопеды Рамил Рәхимов та көчен күрсәтте. 90 килограммнан артык авырлык категориясендә ул 25 килограммлы герне 100 тапкырдан артык күтәреп, III урынны алды.

– Көндәшләр бик җитди, бигрәк тә тимер юлчылар һәм нефтьчеләр профсоюзларыннан килгән спортчылар. Әмма безнең дә еллар буе тупланган күнегүләр бар бит, – дип билгеләде спортчы.

Республика сәламәтлек саклау профсоюзы командасында ике баш табиб та бар иде. Стәрлебаш үзәк район дәваханәсенең баш табибы Александр Юдин команда составында аркан тартышуда катнашты. Толбазы үзәк район дәваханәсенең баш табибы Альмир Хәсәнов гер күтәрүдә көч сынашты. Аның өчен бу спартакиада инде өченче булды, һәм ул өченче тапкыр үз авырлык категориясендә пьедесталга күтәрелде.

Мондый үрнәк медицина коллективлары өчен аеруча мөһим: җитәкчеләр үзләре спорт мәйданчыкларына чыгып, сәламәтлек турында кайгыртуның һөнәри бурыч кына түгел, ә шәхси гадәт булуын күрсәтәләр.

Гаилә стартларында икенче ел рәттән Михайловлар гаиләсе – Вячеслав, Эльмира һәм аларның улы Роман катнашты. Гаилә өчен спорт күптәннән көндәлек тормышның бер өлешенә әверелгән: алар бергәләп шәһәр һәм район ярышларында даими катнашалар.

Сәламәтлек саклау хезмәткәрләренең республика профсоюзы рәисе Рауль Халфин ярышларда катнашучыларның әзерлек дәрәҗәсе елдан-ел арта баруын билгеләп үтте:
– Командаларның һәм көндәшләрнең әзерлек дәрәҗәсе шактый югары, ул елдан-ел үсә. Соңгы елларда спартакиадада призлы урыннар алуыбыз табибларның спортка һәм сәламәт яшәү рәвешенә үз үрнәкләрендә тугрылык күрсәтүе турында сөйли, – диде ул.