“Һөнәрегезне һәм үзегезне һөнәрегездә хөрмәт итегез”

Сәлимә Мөхәммәтова — Киров подстанциясенең ашыгыч медицина ярдәме табибы, Башкортстанның атказанган остазы һәм атказанган табибы, «2024 елның Башкортстандагы иң яхшы табибы», республиканың сәламәтлек саклау хезмәткәрләре профсоюзының актив әгъзасы.

Ашыгыч ярдәм линиясендә 31 еллык эш дәверендә аның сменалары аша яшь медикларның берничә буыны узган. Сәлимә Хәсән кызы билгеләвенчә, остазлык беренче сәфәрдән үк башлана.
“Яшь белгеч диплом алып, барысын да беләм дигән ышаныч белән килә. Ә ашыгыч ярдәм — имтихан түгел. Бу урам. Монда «дөрес җавап» түгел, ә тирә-якта кычкырышканда мәгълүматны тиз җыя белү мөһимрәк, еш кына караңгыда һәм кыска вакыт эчендә.

Мәртәбәле остаз фикеренчә, яшьләрнең иң еш ясаган хатасы — сорарга курку.
“Сорау аларның компетентсызлыгын күрсәтер дип уйлыйлар. Ә чынлыкта дәшмәү куркыныч бит. Икенчедән, алар пациентны түгел, ә диагнозны дәваларга тырышалар. Кешегә түгел, кардиограммага карыйлар. Өченчесе - пациент яки туганнары агрессив булганда югалалар. Моңа да өйрәтергә кирәк”, — ди ул.

Сәлимә Мөхәммәтова яшь белгечләрне иң беренче чиратта уйлаудан курыкмаска өйрәтә. Ул билгеләвенчә, алгоритм — яхшы, ләкин хәл стандарт булмаска мөмкин.
“Мин яшьләргә һәрвакыт әйтәм: әгәр шикләнсәң, шалтырат, киңәшләш, әмма карарны үзең кабул ит. Чөнки пациент янында методичка түгел, ә син калачаксың», — ди тәҗрибәле табибә.
Яшь табиб беренче елда ук янып бетмәскә тиеш — Сәлимә Хәсән кызы өчен остазлыкта иң мөһиме шул. Чөнки ашыгыч ярдәм — авыр, эмоциональ хезмәт. “Мин дә моның аша уздым, бу нормаль”, дия торган кеше янәшәңәдә бар икән, бу коткара”, — дип билгели остаз.

Соклангыч белгечнең яшьләргә киңәше шундый: “Һөнәрегезне хөрмәт итегез. Һәм һөнәрегез эчендә үзегезне. Ашыгыч ярдәм формаль мөнәсәбәтне гафу итми. Ләкин аңа үзеңне чын күңелдән багышласаң, ул сиңа күпне бирәчәк тә”.