294 мең сумга – “Лада Гранта”...

Арзан хакка яңа машина алам дип, мошенниклар тозагына эләгә күрмәгез!

Бүген тормышыбызны машинасыз күз алдына да китерерлек түгел. 30 еллар элек транспорт чарасы кайбер гаиләләрдә генә булса, хәзер һәр йортта диярлек икешәр машина бар. Әмма бүген, дөньядагы хәлләргә бәйле рәвештә, машинага хаклар шактый артты. Күп кенә машина маркалары җитештерүчеләр ил базарыннан китте. Бүген автосалоннар, нигездә, Кытайда һәм Русиядә җитештерелгән машиналар белән сәүдә итә.

Шулай итеп, бер көнне редакциягә хәбәр килеп иреште: имеш, Уфаның бер автомобиль салоны “Лада Гранта” машинасын 294 мең сумга гына сата. Әлбәттә, бу яңалык безне кызыксындырды, чөнки бу машинаның бәясе башка салоннарда 850 мең сумнан башлана. Хәбәргә бик ышанып бетмәсәк тә, аны тикшерергә булдык.
Күрсәтелгән адрес буенча бардык. Тик анда бер җимерек бина гына тора. Янында “Porshe” һәм “Тотылган машина” дип аталган автосалоннар бар. Аптырап, шул салоннарга да кереп карадык. Әмма анда 294 мең сумга “Гранта” юк иде. Бәяләр миллион сумга якын һәм аннан да югары. Әмма без бирешергә уйламадык. Теге автосалонның телефон номерларын таптык. Шалтыраттым. “Безнең анда юридик офис, машина сатыла торган урын икенче адрес буенча. Килегез. Сезне менеджер Никита көтә”, дигән җавап килде.

Янә кушылган адрес буенча юл тоттык. Бу урын Уфаның икенче очында булып чыкты. Бара торгач, ниндидер иске гаражлар арасына килеп чыктык. Анда билге тора: “Дальше – автосалон”. Ичмасам, ул автосалонга барасы юл да яхшылардан түгел. Яңа “Гранта” алабыз, дип, “Ларгус”ыбызга каты гына сынау төште. Ниһаять, бу машина салонын таптык. Бик матур гына зур бина тора. Эчендә тотылган чит ил машиналары да күренә, тик “Гранта” гына юк. “Ярар, арткы ягында торадыр”, дигән өметләр белән менеджер Никита янына кердек.

Безне матур кием кигән, елмаеп торучы егет каршы алды.

– Без 294 мең сумлык “Гранта”ны күрергә килгән идек, мөмкинме? – дип машинаны күрергә өметләнеп, менеджерга мөрәҗәгать иттек. Ул безне үзенең өстәле янына чакырды, әмма машиналарны күрсәтергә ашыкмады.

Никита белдерүенчә, бу машиналар бар һәм алар чыннан да 294 мең сумга сатыла. Тик машиналар банкныкы һәм аларны акчага алып булмый. Кредитка гына рәсмиләштерергә мөмкин. Әмма аны кредитка алганда төрле өстәмә түләүләрне дә шул машина алу килешүенә кертәләр. Ул исемлеккә каско, машинаны һәм гомереңне страховкалау керә. Шулай ук, машинада булырга тиешле әйберләрне алардан алырга тиешсең. Алар – магнитола, янгын сүндерү җиһазы, аптечка, домкрат һәм башка кирәк-яраклар. Һәм, нәтиҗәдә, машинаның бәясе 900 мең сумнан артып китә. Җитмәсә, машинаны кредитка алгач, аның процентларын да түләргә кирәк.

Никитаның сүзләрен ишеткәч, кәеф төште, әмма без аннан китәргә ашыкмадык. Бер килгәч, яңа “Гранта” машиналарын күреп китәргә булдык. Банк машиналары булгач, бәлки, ниндидер үзгәрешләре дә бардыр, дип уйладык. Әмма арытаба ачыклануынча, бу машиналар автосалонда бөтенләй юк. Менеджер белдерүенчә, машина бу салонга кредит рәсмиләштерелгәч, бер сәгатьтән соң гына китереләчәк. Ә аның төсен һәм башка әйберләрен компьютердан күрсәтәбез, ди. Бу сүзләрне ишеткәч, Никита белән саубулашырга да онытып чыгып киттек.

Шушы хәлгә нәтиҗә ясап, бу салонны мошенниклар оясы дип әйтсәк тә, дөрес буладыр. Чөнки кешеләр, Интернетта урнаштырылган рекламага ышанып, республиканың төрле районнарыннан 294 мең сумга “Лада Гранта” машинасы алырга килә. Ә ул машина анда бөтенләй юк. Анда матур киемдәге һәм матур итеп сөйләүче Никита гына бар. Ул шулкадәр матур сөйли, аны тыңлыйсы гына килеп тора. Тик уяулыкны гына югалтырга ярамый. Чөнки 294 мең сумга машина алырга килеп, миллион сумнан артык торганны алып кайтып китәргә мөмкин.

Шунысы мөһим: бу реклама, беренче чиратта, яшьләргә түгел, өлкән яшьтәге кешеләргә исәпләнгән. Мәсәлән, Интернет челтәренә кереп, 294 мең сумга “Гранта” машинасы сатыла” дигән хәбәрне эзләп карадым. Бу яңалык миңа – 30 яшьлек егет өчен чыкмады. Ә туган абыемның (аңа 68 яшь) телефоныннан кереп, бу хәбәрне тәки таптым! Димәк, алар өлкән яшьтәге кешеләрне җәлеп итеп, алдап, машина сатарга тырыша. Шуңа күрә, дуслар, сак булыгыз! Мондый яңалыкларга ышанмагыз!

Ример НАСРЕТДИНОВ.

Автор:Ример Насретдинов

Читайте нас:

Теркәлү саны: 2019 елның 24 маендагы Эл сериясе № ФС 77-75682.

Басманың яшь категориясе 12+

___________________

Сетевое издание «KizilTan» зарегистрировано Федеральной службой по надзору в сфере связи, информационных технологий и массовых коммуникаций (РОСКОМНАДЗОР)

Регистрационный номер: серия Эл № ФС 77-75682 от 24 мая 2019 г.

Возрастная категория издания 12+

Гамәлгә куючылары: Башкортстан Республикасы Матбугат һәм киңкүләм мәгълүмат чаралары агентлыгы, Башкортстан Республикасының “Республика Башкортостан” Нәшрият йорты дәүләт унитар предприятиесе.

____________________

УЧРЕДИТЕЛИ: Агентство по печати и средствам массовой информации Республики Башкортостан, Государственное унитарное предприятие Республики Башкортостан Издательский дом «Республика Башкортостан».

Баш мөхәррир Фаил Камил улы Фәтхетдинов.

Кабул итү бүлмәсе телефоны: 8 (347) 272-13-61.

___________________

Главный редактор: Фатхтдинов Фаил Камилович.

Телефон приемной: (347) 272-13-61.

Телефон

8(347)272-13-61

Электрон почта

kyzyltan@mail.ru

Адресы

450079, Уфа шәһәре, Октябрьнең 50 еллыгы урамы, 13 нче йорт

Реклама хезмәте

8(347)272-62-27

Хезмәттәшлек

8(347)272-62-27