Уңыш мул булгач, бәйрәм дә күңелле

Соңгы елларда зур реконструкция эшләреннән соң заманча җиһазлан­дырылган Яшьләр мәдәният сарае бу көнне республика авыл эшчәннәренең казанышлар үзәгенә әйләнде. Республика җитәкчелеге һәм кунаклар игътибарына биредә аграр тармакның быелгы уңышлары тәкъдим ителгән. Стендларда — Башкортстанда тормышка ашырылучы инвестицион проектлар, Бөтенрусия “Алтын көз-2014” халыкара күргәзмә­сеннән җиңү белән кайткан аграр предприятиеләр турында бай мәгълүмат бар.
Башкортстанның төрле төбәклә­реннән һөнәри бәй­рәмгә җыелучы авыл эш­чәннәрен Республика Пре­зиденты Рөстәм Хәмитов тәб­рикләде. Ул үзенең чыгышында агросәнәгать­челәрнең быел да катлаулы һава шартларында табигать көйсезлеге белән бәйле мәшә­катьләрне намуслы, тырыш хезмәт белән җиңеп чыгуын ассызыклады.
— Башкортстан илдә тулай авыл хуҗалыгы продукциясе җитештерүдә җиденче урында. Узган тугыз айда 104 миллиард сумлык продукция җитеш­терелде. Республиканың “Алтын көз-2014” күргәзмәсендә 400дән артык алтын һәм көмеш медаль яулавы аграр тар­макның никадәр тотрыклы булуын күрсәтә, — диде Рөстәм Хәмитов үзенең чыгышында.
Республика башлыгы алда торган бурычларга тукталып, авыл хуҗалы­гында заманча техно­логияләрне күбрәк куллану, селекция, биотехно­логия һәм орлыкчылык базаларын арттыру мәсьәлә­ләренә игътибарны көчәйтү кирәклеген билгеләде. Рөстәм Хәмитов соңгы елларда тармакта техника сатып алуның артуын ассызыклады һәм киләчәктә дә яхшы эш нәтиҗәләренә китерүче дәүләт ярдәме күрсәтелү туктал­маячагын әйтте.
— Быел техник модер­низацияләү һәм “500 ферма” программасын тормышка ашыру максатында өстәмә рәвештә акча бүләргә карар ителде. Ел ахырына кадәр аның 250 миллион сумы күчереләчәк, — диде Президент республика аграрийлары бәйрәмендә.
Президент, шулай ук, ирешелгәннәр белән генә чикләнмичә, Башкортстан агросәнәгатьчеләренең киләчәктә дә авыл хуҗалыгы җитештерүендә Русиянең ышанычлы тылы булып калачагына зур ышаныч белдерде.
Башкортстан авыл хуҗалыгы хезмәткәрләре бәйрәмендә, шулай ук, Кырым Республикасының Белогорск районыннан кунаклар катнашты.
Республиканың авыл хуҗа­лыгы һәм эшкәртү сәнәгате хезмәткәрләре бәй­рәме сәнгать осталарының зур концерты белән тәмамланды.