+20 °С
Болытлы
Гәзиткә язылуVKOKTelegram
Барлык яңалыклар
Новости
30 апрель 2015, 22:25

Шәһәр халкы үзен ризык белән тәэмин итәргә сәләтле

Моның өчен бакча-дачалар мөмкинлеген нәтиҗәлерәк эшкә кушарга кирәк.Табигать, җир уянган мәл җитте. Бар тереклек кояш җылысын тоеп иркәләнә. Ә май — елның аеруча көтеп алынган мизгеле. 1 Майны Хезмәт ияләренең теләктәшлек бәйрәме буларак билгели идек, русиялеләр бүген аны чын мәгънәсендә ял һәм хезмәт бәйрәменә әверелдерде. Бу көннәрдә авыл ихаталарында, бакчачылык ширкәтләрендә һәм дачаларда халык “сезон” ача. Бакчаларында миллионнарча кеше алдагы уңыш хәстәрлеге белән мәшгуль.Бакча участоклары һәм дача кооперативлары соңгы елларга кадәр бары тик аларның хуҗалары мәнфәгатьләрендә хезмәт итте. Сер түгел, АКШ һәм Евросоюзның Русиягә карата кулланган санкцияләре, шулай ук, нефть хакларының кинәт түбән төшүе илдә, Башкортстанда инфляция үсүгә, аерым төр азык-төлеккә бәяләрнең акланмаган дәрәҗәдә күтәрелүенә китерде. Әйтергә кирәк, быел бәйрәм көннәрендә вакытны күңел ачу чараларына түгел, ә бакча, дача участокларында күбрәк яшелчә-җимеш, бәрәңге утырту, мөмкинлек булганда, артыгыннан өстәмә керем алу турында да уйланырга онытмыйк.Әлбәттә, авыл халкы бу мәсьәләдә ниндидер киңәшкә мохтаҗ түгелдер. Соңгы елларга кадәр шәһәрдәге һәр икенче гаиләнең диярлек дачасы, бакчасы бар иде. Алар арасында аз тәэмин ителүче гаиләләр дә аз түгел. Күптән түгел без “Кызыл таң” гәзите эксперты —Дәүләт җыелышы-Корылтайның Аграр мәсьәләләр, экология һәм табигатьтән файдалану комитеты рәисе, икътисад фәннәре докторы Рәсүл Госмановка “Шәһәр халкының язгы-җәйге вакытта үз-үзен туклану продуктлары белән тәэмин итүен ничек күтәреп була?” дигән сорау белән мөрәҗәгать иттек. Башкортстан Башлыгының агросәнәгатьне үстерү мәсьәләләре буенча киңәшчесе бу тәкъдимне хуплап каршы алды. Сүз Рәсүл Үзбәк улы Госмановка.

Русия шәһәрләрендә элек-электән халыкны яздан урындагы яшелчә, иртә өлгерүче бәрәңге белән тәэмин итү проблема булып килде. Тарихка күз салсак, 1941-45 елларда — илдәге барлык дәүләт предприятиеләренә сугыштан соңгы елларда үзләрендә эшләүче һәр гаиләгә 1-2 сутый исәбеннән җир арендалау мөмкинлеге бирелде. Участокларга халыкны йөртү өчен махсус автобус маршрутлары оештырылды. Аз тәэмин ителгән гаиләләргә җир участоклары 4-6 сутый чикләрендә даими куллануга 1960 елдан соң гына бирелә башлады. Кызганычка каршы, аларның социаль-икътисади әһәмияте соңгы егерме елда зур үзгәреш кичерде. Хәллерәк шәһәр кешеләре элекке бакча участокларын коттедж төзү максатында сатып ала башлады. Аларның мәйданы 10-14 сутыйга җитте. Шунысы да бар, байтак еллар элек шәһәр яны бакчалары халыкны экологик яктан чиста продукт белән тәэмин итсә хәзер, нигездә, алар ял итү, дөнья мәшәкатьләреннән арыну, шәһәр ыгы-зыгысын оныттыру урынына әверелде. Әйткәндәй, ил Президенты Владимир Путинның әмере белән шәһәр яны маршрутлары буенча тимер юлчылар хезмәтен тергезү дә, минемчә, бакчачыларга зур ышаныч бирә.
Читайте нас: