+20 °С
Болытлы
Гәзиткә язылуVKOKTelegram
Барлык яңалыклар
Новости
8 октябрь 2015, 20:57

Дөнья күләмендә — беренче!

ШОС һәм БРИКС илләре арасында “төбәк белән төбәк” форматында хезмәттәшлеккә Уфада нигез салыначак.Мәгълүм булуынча, 21-23 октябрьдә Уфада ШОС һәм БРИКС дәүләтләре төбәкләренең Беренче кече бизнес форумы үтәчәк. Шушы уңайдан бүген Мәскәүдә, Башкортстан Республикасының Русия Президенты каршындагы Тулы вәкаләтле вәкиллегендә зур матбугат конференциясе оештырыла. Аның эшендә мөһим форумны оештыру комиссиясе рәисе, Башкортстан Хөкүмәте Премьер-министры урынбасары Дмитрий Шароновның, ШОСның Эшлекле Советының башкарма секретаре Сергей Канавскийның, Русиянең сәнәгать һәм сәүдә министры урынбасары Сергей Цыбның, икътисади үсеш министры урынбасары Олег Фомичевның, башка җаваплы җитәкчеләрнең катнашуы көтелә.

Әйтергә кирәк, Уфада үтәчәк форумга ил күләмендә дә шушы рәвешле зур әһәмият бирелүе очраклы түгел. Әлеге дөньякүләм җыен ШОС һәм БРИКС дәүләтләре бизнес структуралары, бизнес һәм төбәк власть органнарының икътисади хезмәттәшлеге өчен гамәлдәге беренче интеграцион мәйдан булып тора. Моннан тыш, ул “төбәк белән төбәк” форматындагы бизнес-очрашу­ның дөньядагы тәүге үрнәге дә. Мәгълүм булуынча, ШОС һәм БРИКС дәүләтләре төбәкләре арасында турыдан-туры эшлекле бәйләнешләр урнаштыруга юнәлтелгән шушы форматтагы хезмәттәшлекне үстерү башлангычын 2014 елда Бразилиядә үткән БРИКСның Эшлекле Советы утырышында Башкортстан Башлыгы Рөстәм Хәмитов тәкъдим итте. Агымдагы елның июлендә Уфада үткән ШОС һәм БРИКС саммитлары барышында исә әлеге идея зур хуплау тапты.
— Бүгенге көндә ШОС һәм БРИКС дәүләтләре кече һәм урта бизнесының төбәкара хезмәттәшлекне һәм икътисади бәйләнешләрне үстерү өчен зур мөмкинлеге бар. Бу эшне үстерергә һәм системалы нигездә оештырырга кирәк. ШОС һәм БРИКС дәүләтләре төбәкләре вәкилләренең беренче форумы тиз арада һәм максатлы рәвештә партнерлар табу, үз бизнесыңны үстерү, тәҗрибә уртаклашу өчен нәкъ әнә шундый мәйдан булачак та инде, — диде, атап әйткәндә, Башкортстан Башлыгы Рөстәм Хәмитов.
Бу җәһәттән Уфада үтәчәк форумда 15 дәүләттән — Бразилиядән, Татарстаннан, Үзбәкстаннан, Әфганстаннан, Беларусьтан, Төркиядән, Ита­лиядән, Сербиядән, Кытайдан, Канададан, Бөек Британиядән, Пакистаннан, Угандадан, Һиндстаннан һәм Русиядән делегацияләр катнашуы көтелә. Алар арасында агросәнәгать комплексы, мәгълүмат тех­нологияләре, төсле металлургия, страховкалау һәм консалтинг компанияләре вәкилләре бар.
ШОС һәм БРИКС дәүләт­ләре арасында төбәкара бәйләнешләр булдыру һәм аларны үстерү; аларда мал­табарлыкның тизләтелгән үсеше өчен тиешле шартлар тудыру; ШОС һәм БРИКС илләре төбәкләренең эре һәм кече компанияләре арасында субконтрактация һәм аутсорсинг принцибына нигезләнгән партнерлык мөнәсәбәтләре урнаштыру; инвестицияләр җәлеп итү һәм берлектәге бизнес-проектлар санын арттыру; кече һәм урта малтабарлык субъектларына законнар нигезендә һәм финанс яктан ярдәм итүдә иң яхшы эш тәҗрибәсен ачыклау; ШОС һәм БРИКС дәүләтләренең төбәк базарларына компанияләрнең үтеп керүен җиңеләйтү буенча тәкъдимнәрне эшләү максатын алга куйган форумның эш программасы да бай булмакчы. Атап әйткәндә, аның кыса­ларында төрле форматта утырышлар — дискуссияләр, стратегик сессияләр, “түгәрәк өстәл”ләр үткәрү каралган. Биредә шулай ук түләүсез эшлекле бәйләнешләр ярмин­кәсе эшләячәк. Ул төрле илләрдән килгән малтабарларга партнерлар табарга, сөйләшүләр үткәрергә һәм контрактлар төзергә ярдәм итәчәк. Дискуссияләр, стратегик сессияләр һәм “түгәрәк өстәл” утырышлары барышында исә төбәкара инновацион һәм инвестицион башлангычлар инструментларын форма­лаш­тыру, дөньядагы иң яхшы тәҗрибәне исәпкә алып, инновацияләр һәм технология­ләр трансферты механизмнарын камилләштерү мәсьәлә­ләре тикшереләчәк.
Читайте нас: