+24 °С
Яңгыр
Яңалыклар
18 апрель 2025, 06:20
Ачык ут кабызу тыела!
Башкортстанда быел янгынга каршы махсус режим 18 апрельдән кертелде.
Башкортстанның Гадәттән тыш хәлләр буенча дәүләт комитеты рәисе урынбасары Лилия Кәримова билгеләвенчә, урманда да, дача участокларында да ачык ут кабызу тыела. Фейерверклар кулланырга, авыл хуҗалыгы эшләрен ачык ут белән башкарырга ярамый. Тагын бер тыю – урман территориясенә автомобильләр белән керү.
Шулай ук урманнарда шешәләрне яки пыяла кыйпылчыкларын калдырырга ярамый, чөнки алар яндыргыч линзалар кебек эшләргә сәләтле.
"Чүп-чарны җыю вакытында, мәсәлән, өмәләрдә, калдыкларны билгеле бер урыннарга илтергә киңәш ителә. Әгәр сез үз участогыгызда чүп-чарны яндырырга уйласагыз, моны җилсез вакытта металл мичкәләрдә һәм корылмалардан билгеле бер ераклыкта эшләргә кирәк.
Табигатьтә шашлык әзерләүгә килгәндә, моны билгеле бер урыннарда, мангал мәйданчыкларында гына эшләргә киңәш ителә. Янәшәдә утны сүндерү өчен ком һәм су булырга тиеш. Һәм һич кенә дә ачык утны караучысыз калдырмагыз", - дип киңәш итте Лилия Кәримова.
Исегезгә төшерәбез, республикада 2017 елдан янгынга каршы торыш мониторингы «Урман саклаучы» дистанцион видеокүзәтү системасы ярдәмендә алып барыла. Башкортстан территориясендә фото - һәм видеофиксация белән җиһазландырылган 20 мониторинг комплексы урнаштырылган. Система янгынны иртә стадиядә терки, мәгълүмат бердәм диспетчерлык хезмәтләренә тапшырыла.
Фото: "Башинформ"
