ЯИ дәүләт хезмәтләренең нәтиҗәлелеген арттырырга ярдәм итәчәк

Башкортстан Хөкүмәте Премьер-министры Андрей Назаров рәислегендә узган утырышта республика башкарма хакимият органнары һәм Республикага идарә үзәге эшендә ясалма интеллект технологияләрен куллану мәсьәләсе каралды.

– Без дәүләт хакимияте органнары эшенә ясалма интеллект технологияләрен кертүне инде башлап җибәрдек. Хәзер аерым проектларны гамәлгә ашыру белән беррәттән, бу эшне системалы рәвештә оештыру мөһим, – дип билгеләде Андрей Назаров.

Бу хакта Премьер-министр урынбасары Олег Ли чыгыш ясады. Аның сүзләренә караганда, ясалма интеллектны дәүләт идарәсенә кертү өч төп юнәлеш буенча алып барылачак.

Беренче юнәлеш Республикага идарә үзәгенең санлы инфраструктурасын үстерүне күздә тота. Аның кысаларында мәгълүматларны җыю, анализлау һәм күрсәтүнең бердәм системасын булдыру, гражданнар мөрәҗәгатьләрен интеллектуаль анализлау, проектларны күзәтү өчен санлы панельләр кертү һәм заманча ясалма интеллект сервислары өчен инфраструктураны яңарту планлаштырыла.

Икенче юнәлеш дәүләт идарәсендә пилот проектларны гамәлгә ашыруга багышланган. Алар арасында Идарә үзәге базасында интеллектуаль контакт-үзәк, «Дело» электрон документ әйләнеше системасына ясалма интеллект модуле, җир законнарын бозу очракларын автоматик ачыклау, киңәшмәләрне текстка күчерү һәм протокол проектларын әзерләү системасы, «Җитәкченең санлы кабинеты», шулай ук компьютер күзаллавы технологияләре нигезендә һава киңлеген күзәтү системасы бар.

Өченче юнәлеш – дәүләт идарәсен ясалма интеллект ярдәмендә үзгәртү буенча компетенцияләр үзәге булдыру. Ул ясалма интеллект проектларын әзерләү, гамәлгә кертү һәм киңәйтү буенча бердәм мәйданчык булачак, дәүләт органнарына методик ярдәм күрсәтәчәк һәм дәүләт хезмәткәрләренең санлы күнекмәләрен үстерү белән шөгыльләнәчәк.

– Бу чаралар дәүләт идарәсенең нәтиҗәлелеген, кабул ителгән карарларның сыйфатын һәм дәүләт хезмәтләре күрсәтү дәрәҗәсен күтәрергә мөмкинлек бирәчәк, – дип ассызыклады Олег Ли.

Утырыш йомгаклары буенча Андрей Назаров Башкортстанның дәүләт идарәсен санлы үстерү министрлыгына кызыксынучы ведомстволар белән берлектә Идарә үзәгенең санлы инфраструктурасын камилләштерү һәм ясалма интеллект буенча компетенцияләр үзәге булдыруның оештыру моделен әзерләргә кушты.

"Кызыл таң"ның да МАХ мессенджерында рәсми каналы бар. Кушылыгыз!
Каналга кушылыр өчен шушы сылтама буенча үтегез: max.ru/kiziltan102

Фото: башинформ.рф