Башкортстанда ягулык белән вәзгыять яхшыра

Башкортстанда ягулык белән тәэмин итү буенча вәзгыять яхшыра бара. Бу хакта БСТ телеканалындагы чираттагы брифингта республиканың сәнәгать, энергетика һәм инновацияләр министры урынбасары Олег Тыщенко хәбәр итте.

Аның сүзләренчә, хәзер Уфада ягулык салу станцияләрендә чиратлар диярлек юк. Стәрлетамакта да барлык АЗСлар эшли, башка зур шәһәрләрдә дә ягулык белән тәэмин итү тотрыкланган. Проблемалы районнар саны 3–4 кә генә калган. Хәзер төп мәсьәлә – АИ-92 генә түгел, АИ-95 һәм АИ-98 бензиннары да булдыру.

Архангель районындагы ике «Башнефть» ягулык салу станциясендә дә ягулык бар. Ял көннәрендә туристлар күп булу сәбәпле йөкләнеш артса да, хәл контрольдә.

Стәрлетамакта да күпчелек АЗСларда ягулыкның барлык төрләре бар. Ә Кырмыскалы районында «Башнефть» станциясе планлы ремонтта. Белгечләр әйтүенчә, мондый ремонтлар хәвефсезлек өчен кирәк һәм алар график буенча үткәрелә.

Канистрларга ягулык салуга кертелгән чикләүләр дә вәзгыять тулысынча тотрыклангач кына бетереләчәк. Шулай ук бәйсез АЗСларның бер өлеше яңадан эшли башлаган, әмма аларда ягулык бәясе биржадан сатып алыну сәбәпле якынча 20 процентка кыйммәтрәк.

Олег Тыщенко сүзләренчә, АЗСлардагы бәяләр күрсәтелгән таблолар дөрес мәгълүмат бирә, әмма кайчак ягулыкның аерым төрләре вакытлыча булмаска мөмкин.

"Кызыл таң"ның да МАХ мессенджерында рәсми каналы бар. Кушылыгыз!
Каналга кушылыр өчен шушы сылтама буенча үтегез: max.ru/kiziltan102