Башкортстан Иҗтимагый палатасы районнардагы актуаль мәсьәләләрне барлады

7 августта Башкортстан Иҗтимагый палатасы Баймак, Бүздәк, Благовар һәм Әбҗәлил районнарында күчмә очрашулар уздырды. Диалог мәйданчыкларында 250дән артык кеше катнашты.

Очрашулар барышында социаль инфраструктура, махсус хәрби операциядә катнашучыларга ярдәм, кече бизнесны үстерү һәм җәмәгать контроле мәсьәләләре каралды.

Баймак һәм Әбҗәлил районнарында Иҗтимагый палата әгъзасы Артур Гыйльманов социаль проектлар әзерләү буенча семинар үткәрде. Благовар һәм Бүздәк районнарында кибетләрдә җирле брендлар продукциясенең тәкъдим ителүе тикшерелде.

Әбҗәлил районында яшәүчеләр райондагы уңай үзгәрешләрне билгеләсә дә, балалар мәйданчыклары җитмәү, мәдәният йортының ремонт булмау сәбәпле ябылуы, почта хезмәтенең акрын эшләве, юллар һәм медицина учреждениеләре торышы, авылларда кибетләр җитмәве кебек проблемаларны күтәрде.

Баймак районында мөмкинлекләре чикләнгән кешеләр өчен спорт клубы ачылгач, спорт чараларында катнашучылар саны арткан. Шулай ук поликлиникада хәрәкәт мөмкинлеге чикләнгән кешеләр өчен күтәрткеч урнаштыру тәкъдиме яңгырады.

Бүздәк районында махсус хәрби операциядә катнашучыларга ярдәм итү эше дәвам итә. Балалар рәсемнәр ясый, мәктәп укучылары маскировка челтәрләре үрә һәм окоп шәмнәре әзерли. Моннан тыш, җәмәгать мониторингы вакытында җирле җитештерүчеләрнең продукциясе кибет киштәләрендә җитәрлек күләмдә булмавы ачыкланган.

Благовар районында мәктәпләрнең яңа уку елына әзерлеге һәм мәктәп яны лагерьларында туклану сыйфаты тикшерелде. Шулай ук урамнарны яктырту мәсьәләсе күтәрелде. Халык күтәргән барлык мөрәҗәгатьләр Иҗтимагый палата тарафыннан контрольгә алынды һәм профильле ведомстволарга юлланачак.

"Кызыл таң"ның да МАХ мессенджерында рәсми каналы бар. Кушылыгыз!
Каналга кушылыр өчен шушы сылтама буенча үтегез: max.ru/kiziltan102