Игелекле куллар ярдәмгә килә

Миякә районында СВОда катнашучылар гаиләләренә көнкүреш мәсьәләләрен хәл итүдә ярдәм күрсәтүче «Эш остасының кулы алтын» проекты тормышка ашырылды. Башкортстан Башлыгы грантлары фонды ярдәме белән оештырылган проект кысаларында гаиләләргә бушлай адреслы ярдәм күрсәтелде.

Көндәлек тормышта кайбер эшләрне ялгыз башкару җиңел түгел. Өйдә вак-төяк ремонт кирәк булырга, суүткәргеч җиһазларын алыштырырга, кар чистартырга яки башка физик көч һәм махсус күнекмәләр таләп иткән эшләрне башкарырга туры килә. Проект нәкъ шундый мәсьәләләрне хәл итүгә юнәлдерелгән.

Ярдәм күрсәтү өчен «Русия Герое О.С. Визнюк исемендәге Сугыш хәрәкәтләре ветераннары берлеге»нең биш волонтерыннан торган бригада төзелгән. Аларга инструментлар һәм җиһазлар белән эшләргә өйрәтүче тәҗрибәле белгеч-остаз да җәлеп ителгән. Волонтерлар, иң беренче чиратта, эш коралларыннан хәвефсез файдалану күнекмәләрен үзләштергән.

Гаиләләрдән килгән гаризалар буенча белгеч һәм волонтерлар атнага дүрт тапкыр адресларга чыккан. Гаризалар телефон аша, шулай ук авыл җирлекләре хезмәткәрләре аша кабул ителгән. Һәр мөрәҗәгать теркәлеп барган, күрсәтелгән хезмәтләр турында махсус журналда мәгълүмат тупланган. Волонтерлар чиратлашып эшләгән, аларның һәркайсы проектта аена уртача алты сәгать катнашкан.

Эшләрне сыйфатлы башкару өчен кирәкле инструментлар, кирәк-яраклар һәм куллану материаллары да сатып алынган. Проект эшләгән чорда барлыгы 192дән ким булмаган хезмәт күрсәтелгән. Алар арасында электр монтажы эшләре, суүткәргеч җиһазларын алыштыру, түбәләрдән кар чистарту, утын әзерләү, пәрдәләр өчен карнизлар урнаштыру һәм башка көнкүреш эшләре бар.

Проект нәтиҗәсендә Миякә районында яшәүче 80 СВО катнашучысы гаиләсенә ярдәм күрсәтелгән.

Бу ярдәмнең әһәмияте башкарылган эшләр саны белән генә үлчәнми. Кайчак гаиләгә физик хезмәттән тыш, игътибар һәм ярдәмгә таяна алу мөмкинлеге дә мөһим. Проект кысаларында күрсәтелгән ярдәм гаиләләрнең көнкүреш шартларын яхшыртырга, шулай ук аларга өстәмә игътибар һәм кайгырту тоярга мөмкинлек биргән.

«Эш остасының кулы алтын» проектының төп максаты да шуннан гыйбарәт: Миякә районында СВОда катнашучыларның гаиләләренә өйдә һәм йорт тирәсендә килеп чыккан кичектергесез көнкүреш мәсьәләләрен хәл итүдә ярдәм итеп, аларның тормыш сыйфатын яхшырту.

Гади эш кебек күренгән ярдәмнең дә кеше өчен зур әһәмияте булырга мөмкин. Ә кемгәдер ярдәм кирәк икән, аны вакытында күрсәтү — үзе үк зур игелек.