Башкортстан һәм Беларусь сәнәгать өлкәсендә хезмәттәшлекне көчәйтә

Беренче килешү Уфа трамвай-троллейбус заводы, Минск автомобиль заводы һәм «МАЗ-УТТЗ» электр транспортын үстерү территориясе арасында төзелде. Яклар «Сәнәгать-логистика паркы «Платформа» мәйданчыгында техника җитештерүне оештырырга җыена. Төп максат – көндәшлеккә сәләтле продукция чыгару һәм соңгы продуктны локальләштерү дәрәҗәсен арттыру.

Башкортстан Сәнәгать үсеше фонды һәм Беларусь инновацияләр фонды инновацияләрне яклау, технологияләр трансферы һәм технологик суверенитетны ныгыту өлкәсендә хезмәттәшлек турында килеште. Яклар уртак сәнәгать проектларын эзләү һәм гамәлгә ашыру, аналитик һәм методик материаллар белән алмашу, очрашулар һәм конференцияләр үткәрү, шулай ук уртак җитештерүләр булдыруга ярдәм итү белән шөгыльләнәчәк.

Тагын бер килешү Башкортстан Сәнәгать үсеше фонды белән Беларусь эшкуарларына финанс ярдәме фонды арасында төзелде. Ул кече һәм урта бизнеска ярдәм итүгә юнәлтелгән. Яклар эшкуарларга туры кооперация элемтәләре урнаштырырга, ташламалы финанслау – заемнар, лизинг һәм гарантияләр өлкәсендә тәҗрибә уртаклашырга ярдәм итәчәк.

Башкортстанның тышкы икътисади элемтәләр һәм конгресс эшчәнлеге министры Маргарита Болычева билгеләп үтүенчә, республика Беларусь белән төрле юнәлешләрдә уртак проектларны үстерә. Аның сүзләренчә, Минск автомобиль заводы һәм Уфа трамвай-троллейбус заводы хезмәттәшлеге сәнәгать кооперациясенең ачык мисалы булып тора.

Килешүләр Башкортстан белән Беларусь арасындагы хезмәттәшлекне киңәйтүгә юнәлтелгән юл картасы кысаларындагы эшне дәвам итә. Яклар стартаплар һәм кече бизнеска ярдәм итүдән алып эре уртак җитештерүләр һәм инвестиция кластерларына кадәр кооперацияне үстерергә ниятли.

Фото: pravitelstvorb.ru