Юл булмаса, үсеш туктала

Август башында Баш­корт­станның “Инцидент-менеджмент” мәгълүмат сис­темасы һәм кире элем­­­­­тә платформасы ха­лык­ның төрле сораулар буенча 6117 мөрә­җәгатен теркәгән. Иң күп хәбәрләр – юллар буенча (1437). Еш кына чокырларга зар­ланганнар (332), юл чатларын ремонтлауны сорыйлар (326). Иң күп хәбәрләр Уфадан һәм Туймазыдан.

Бакалы районында да юллар торышына бәйле мәсьәлә еш күтәрелә. Хәвефсезлек, балаларны – мәктәпкә, өлкән­нәрне эш урыннарына илтү, авы­руларны ашыгыч ярдәм машинасы белән вакытында дәваханәгә китереп җиткерү – болар барысы да юлларның торышына турыдан-туры бәй­ле.

Шуңа күрә дә Бакалы – Яңа Катай юлын төзекләндерү турындагы яңалык авыл халкы өчен сөенечле хәбәр булды. Бу эшләр халык мөрәҗә­га­теннән соң башкарылды. Район кешеләре урындагы хаки­мияткә дә, республика власть органнарына да язды, авыл җыен­нарында һәм шәхси кабул итүләрдә дә әлеге мәсь­әләне күтәрде. Нәтиҗәдә, боз урыныннан кузгалды.

Быел 12 апрельдә Бакалы районы хакимияте башлыгы Олег Ефимовның социаль челтәрдәге рәсми битендә дә халык мөрәҗәгате теркәлде, анда Сергей Тычинин исемле кеше юлны төзекләндерүне сорап мөрәҗәгать итте. Әлеге хәбәр “Инцидент-менеджмент” системасында теркәлеп, мәгъ­лү­мат-аналитика бүлеге хез­мәт­­кәрләре тарафыннан эшкә алынды. Белгечләр вәзгыять­не бәяләде, урынга чыгып тикшерде һәм юлны ремонт планына кертте. Нәти­җәдә, август башында подрядчы оешма дүрт участокта гомум озынлыгы 857 метр булган юл өле­шен асфальтлады.

Авыл кешеләре әлеге эшкә зур канәгатьлек белдерде. Хәзер транспорт хәрә­кәте күпкә уңай­лырак һәм хәвеф­сезрәк тә. Авыл­га кунакка кайтучылар да юлның уңайлы булуын билгели.

Ләкин Бакалы районында юл мәсьәләсе бер генә участок белән чикләнми, районның башка авыллары да үз чиратын көтә. Михайловка – Иске Әҗми һәм Яңа Илек – Татарстан чиге автомобиль юлларында төзекләндерү эшләре башланды. Бу юнәлешләрдәге юллар күптәннән ремонт көтә иде. Халык фикеренчә, юллар­ның начар булуы авыл хуҗа­лыгы продукциясен каядыр илтеп сатуны да катлауланды­ра, юлсызлык яшьләрне дә авылдан китәргә мәҗбүр итә. Авыллардан шәһәргә чыгып йөрү юлы уңайлы булырга тиеш. Юллар төзек булмаганда мөмкин­лекләр чик­ләнә.

Авыл халкы юлларның тө­зек­ләндерелүен зур өмет белән көтә. Бакалы авылында яшәүче Равил Шәйхетдинов болай ди: “Юл – ул безнең тормышның нигезе. Әгәр юл булмаса, авыл сүнә. Барысына да юл кирәк: балаларны укырга җибәрү, базарга продукция илтү, табибка барып кайту өчен дә. Шөкер, Бакалы – Яңа Катай юлы төзекләндерелде. Моның өчен район хакимия­тенә зур рәхмәтләребезне җиткерәбез. Әмма башка юллар да чират көтә”.

Соңгы елларда республикада юл төзелеше буенча зур проектлар гамәлгә ашырыла. Илебез Президенты Владимир Путин тарафыннан гамәлгә ашырылган “Хәвефсез һәм сыйфатлы автомобиль юллары” гомумдәүләт проекты ниге­зендә күп кенә авыл юллары яңартылды. Әмма һәр районда, бигрәк тә авыл җирендә, төзекләнде­релә­се юллар кала әле.

Бакалы районы мисалында да башкарасы эшләр байтак. Районның һәр авылына уңай­лы юл кирәк. Бу – авыл хал­кының төп таләбе һәм киләчәк үсеш өчен шарт.

Авыл юллары – ул халык­ның тормыш дәрәҗәсен билге­ләүче төп күрсәткеч­ләрнең берсе. Юлсыз авыл – үсеше тукталган авыл. Шуңа күрә юл төзелешен дәвам итү, халык фикерен исәпкә алу һәм һәр ел саен яңа участокларны ремонтлау – власть органнары эшчәнлегендә өстен­лекле бурыч булып тора.