Галимнәр казанышлары турында сөйләделәр

8 февральдә Русия фәне көне билгеләп үтелә. Соңгы елларда илдә фән актив үсә, һәм мондый үсешнең бер сәбәбе дип дәүләт тарафыннан ярдәм күрсәтүне һәм тикшеренүләр үткәрү өчен кирәкле шартлар тудыруны атыйлар. Бу эш кысаларында Уфада 2024 елның февралендә вузара студентлар кампусының беренче чираты эшләтеп җибәрелде, аның базасында бүген 20гә якын лаборатория һәм үзәк эшли. Һәм бүген кампус резидентларының берсе, Уфа фән һәм технологияләр университеты галимнәре үзләре һәм казанышлары турында сөйли.

Доцент, яшел химия һәм ресурсларны саклау технологияләре кафедрасы мөдире Адель Квятковская атаклы химиклар Әмирхановлар династиясе вәкиле булып тора. Аның бабасы Әнвәр Әмирханов - күренекле галим, Бөек Ватан сугышында катнашкан. Сугыштан соң аны Европа лабораторияләренә эшкә чакыралар, ләкин ул СССР Фәннәр академиясенең яңа гына оештырылган башкорт филиалында калырга карар кыла. Аның кызлары Наилә һәм Флора УГАТУ һәм БДУда танылган химиклар булалар. Наилә Әнвәр кызы, профессор, Башкортстанның атказанган химигы, электрохимия мәктәбенә нигез сала. Бүген бу гаиләнең дүртенче буыны вәкиле университетта «биотехнология» белгечлеге буенча белем ала.

– Мин БашДУның химия факультетын кызыл диплом белән тәмамладым, – дип сөйли Адель Квятковская. - Алга таба фәнни тикшеренүләремне УДАТУның гомум химия кафедрасында аспирантурада дәвам иттем. Кандидатлык диссертациясен яклап, шунда эшләргә калдым. Ягъни минем өчен УУНиТ - икеләтә якын вуз. Мин металларны һәм эретмәләрне эшкәртүнең электрохимик процесслары, кушылмаларны электрохимик бүлеп чыгару һәм коррозия процессларын өйрәнү өлкәсендә тикшеренүләр белән шөгыльләнәм.

Фото: pravitelstvorb.ru