Шәйморатовның туган авылыннан – агач үсентеләре

Биредә Луганск Халык Республикасы делегациясе булып китте. Ә икенче көнне Шәй­моратов авылы “Төнге бүреләр” Бөтен­русия мотоклу­бының Башкортстан бүлекчәсе әгъзаларын кабул итте. Хәтта иртән башланган койма яңгыр да аларның сәфәренә комачаулый алмады. Ә бирегә алар изге бурыч белән килде. Шул көннәрдә “Төнге бүреләр” моток­лубының иле­безнең төрле төбәк­ләрендә яшәүче әгъзалары берләшеп, Луганск һәм Донецкка юлланды. Донбассны немец илбасарларыннан азат итү көне уңаеннан, биредә 800 агач утыртыла. Алар һәр төбәкнең Бөек Җиңүгә өлеш керткән билгеле шәхесләренә багышлана. Башкортстан бүлек­чәсе әгъзалары агач үсен­теләрен дивизия командирының туган авылыннан алып барырга карар иткән. Шушы ният белән Кырмыскалы районына Уфадан гына түгел, рес­публикабызның төрле шәһәр­ләрендә яшәүче байкчылар җыелды.
– Сәфәребезгә илебезнең төрле төбәкләрендә яшәүче “Төнге бүреләр” мотоклубы әгъзалары да кушылачак. Ә Башкортстаннан дүрт кеше барачакбыз. 2016 елда без Луганск шәһәрендә Донбассны азат итүдә катнашкан геройлар, шул исәптән легендар командир Миңнегали Шәйморатовка багышланган “Хәтер йолдызы”н алып барып урнаштырган идек. Хәрби хәрәкәтләр барышында аны берничә тапкыр шартлаттылар, ләкин ул барыбер тергезелде. Ул гына да түгел, узган елда шундый ук зур йолдыз Донецк шәһәрендә дә куелды. Шушы җирләрдә йөреп, клуб әгъзасы Руслан Дорошенко М. Шәйморатовка багышлап “Йолдыз” дигән җыр иҗат итте. Бу җырны мотоклубның якын дусты Юлия Чечерина да ишетте һәм аны бергәләп башкарырга тәкъдим итте. Җырны Миң­негали Минһаҗ улының туган көнендә яздырдык. Менә бу сәфәребезгә Юлия Чечерина да кушылып, тантаналы чарада җыр белән таныштыру узачак, – диде сәфәрнең максаты турында бүлекчә җитәкчесе Семен Кулагин.
Кунаклар Миңне­гали Шәй­моратовның туган авылындагы һәйкәленә чәчәкләр салды һәм күпфункцияле авыл мәдәният йортында урнашкан күргәзмә залында да булды, шулай ук 112нче дивизия һәм аның командирының хәрби юлына багышланган 3-D маппинг форматындагы фильмны карады.
Кунакларда легендар коман­дирның биографиясендәге әлегә кадәр билгесез булган фактлар зур кызыксыну тудырды. Туган якны өйрәнүче Резида Әхтәмова – Миңнегали Шәйморатовка туган тиешле кеше. Шуңа да аның тормыш юлын өйрәнү буенча ул бик зур эш башкара. Дивизиядә хезмәт иткән якташ-яугирләрнең исемлеген төзүгә дә ул зур өлеш кертте. Ә бу көнне ул кунакларга Миңнегали Минһаҗ улының балачагы һәм үсмер еллары турында кызыклы мәгълүматлар җиткерде. Ятимлек ачысын бик иртә татыган егет, әти-әнисе вафат булгач, туганнары турында хәстәрлек күрә, бәләкәйдән байларга, муллаларга ялланып эшли. Кечкенәдән чыныгып, авырлыкларга бирешмәскә өйрәнеп үсә, шул ук вакытта бик актив була, иптәшләрен дә үзенең артыннан ияртә. Тормышчан уеннар уйнап үсәләр, атларга булган сөюе дә әнә шул балачактан килә. Бу сөюне ул авыл малайларында да тәрбияли: бергәләп атларны елгада су кертәләр, ялларын тарыйлар, чистарталар, өйрә­тәләр. Үсә төшкәч, Миңнегали өлкәннәр белән беррәттән Сабантуйларда катнаша һәм зирәк акылы, көчлелеге белән аерылып тора. Барысы да яратып, якын күреп, аны Миннуш дип йөртәләр. Балачактан алып фронт елларында да аның белән бергә булган гармуны турында әйтми мөмкин түгел. Бай үзенең өч малаена гармун алып бирә, ләкин аларның уйнарга өйрәнергә теләге булмый. Миңнегалинең кызыксынучан күзләрен күреп, бай аны Миңнегалигә бүләк итә. Бу гармунны ул һәрвакыт үзе белән йөртә, хәтта сугышта да ул аның якын дусты була.
– Миңнегали Шәйморатов – күпкырлы шәхес. Бик күп телләр, шул исәптән кытай телен дә яхшы белгән. Аның оештыру осталыгына да хәйран калырлык: гади колхозчылардан ул данлыклы дивизия төзүгә ире­шә. Без якташыбыз белән чиксез горурланабыз, – дип билгеләде кунакларны бу сәфәрдә озатып йөргән район хакимияте башлыгы Әлфир Сабиров.

Фото: Эльвира Ямалетдинова.