“Бер тәрәзә”дән йөзләр җавап көтә

Күренүенчә, республика Хөкүмәте халыкка дәүләт һәм муниципаль хезмәт күрсәтүне камилләштерүгә зур чыгымнар бүлгән. Кызганычка каршы, мондый үзәкләр аерым районнарда һаман да нәтиҗәле эшләп китә алмый. Дәүләт тарафыннан бүленгән акчаны максатлы тотынмау очраклары да бар. Республика Контроль-исәп палата­сының чираттагы утырышында сүз шул хакта барды.
Контроль-исәп палатасы аудитор­ларының тикшерү нәтиҗәләре катгый булды. Программаны тормышка ашыруда дәүләт заказчысы ролен үтәгән Икътисади үсеш министрлыгы максатлы чараларны үтәүгә контрольлек итүдә таләпчәнлек күрсәтмәгән. Мәсәлән, республика төбәкләрендә “Бер тәрәзә” принцибы буенча эшләүче үзәкләр планлаштырылган күләмдә оештырылмаган. Соңгы мәгълүматлар күрсәтүенчә, 45 подразделение сафка кертелмәгән, ягъни 1,2 миллион кешене хезмәт­ләндерергә тиешле үзәкләр ачылмаган.
— Министрлык, тикшерүчеләр контроль чаралар үткәргәннән соң гына гомум суммасы 63 миллион сумлык субсидияләрне өч районның ничек файдалануы турындагы отчетны тәкъдим итте, — диде аудитор Елена Петрова. — Шунысы да игътибарга лаек: узган елның сентябренә әлеге акчаның 41 миллион сумының гына ничек файдаланылуы документлар белән расланган. Министрлык программаның 2011-12 елларда гамәлгә керү буенча нәтиҗә­лелегенә бәя бирү эшен башкармаган. Тикшерү чорында күп­функцияле үзәкнең дүрт подраз­делениесендә контроль чаралар үткәрелде. Чират көтүнең норматив вакыты (15 минут) үтәлми. Башкаланың Яңа Күпер урамында урнашкан “Бер тәрәзә” офисында ике сәгатьтән артык чират көткән булсак, Интернациональ урамда — сәгатьтән күбрәк, Бәләбәйдә 40 минут вакыт үтте.
Җитешсезлекләрне, гадәттә, финанс мөмкинлекләре чикле булу белән аңлаталар. Әмма бу очракта сәбәп акчада гына микән? Шул ук вакытта, Авыргазы районы үзәге Толбазы авылында, Бәләбәй шәһәрендә һәм Уфаның Интернациональ урамында урнашкан офисларда универсаль электрон карталар белән эшләү мөмкинлеге юк. Дәүләт власте органнары арасында үзара электрон бәйләнеш тиешле дәрәҗәдә түгел.