-9 °С
Болытлы
Гәзиткә язылуVKOKTelegramЯRus
Барлык яңалыклар
Көнүзәк
2 февраль 2016, 02:00

Гражданнарны нәрсә борчый?

Узган елда республика Хөкүмәтендә 14 мең 313 мөрәҗәгать кабул ителгән.Власть ачыклыгын, аңлашыла ки, тәү чиратта гражданнар мөрәҗәгать­ләре белән эшнең ни дәрәҗәдә нәтиҗәле оештырылуы билгели. Бу җәһәттән республикада эш “Русия Федерациясендә гражданнар мөрәҗәгатьләрен карау тәртибе турында” Федераль законга, “Башкортстан Республикасында гражданнар мөрәҗәгатьләре турында” республика законына, республика Хөкүмәтенең 2004 елның 5 апрелендәге 50нче санлы карары белән расланган Регламентка һәм республика Хөкүмәтенең 2014 елның 18 июлендәге 737-р санлы күрсәтмәсе белән расланган Хөкүмәт Аппаратында эшләр алып бару буенча Инструкциягә ярашлы оештырыла.

Әлеге документларда билгелән­гән­чә, эшләр кулдан язма рәвеш­тә, почта һәм факс элемтәсе, элект­рон почта аша, шулай ук, “Башкортстан Республикасы влас­ть органнарының кабул итү бүлмә­се web-сервисына кабул ителә. Барлык язма мөрәҗәгатьләр дә өч көн эчендә теркәү үтеп, Башкорт­стан Башлыгы, Хөкүмәт Премьер-министры, аның урынбасарлары тарафыннан карала һәм тиешле йөклә­мә­ләр белән чара күрү өчен респуб­ликаның башкарма власть органнарына, муниципаль район һәм шәһәр округлары хакимият­ләренә, тәгаен оешма­ларга җибә­ре­лә.

Бу җәһәттән узган елда респуб­лика Хөкүмәтендә җәмгысы 14 мең 313 мөрәҗәгать кабул ител­гән. Эчтә­легеннән чыгып, аларның 1476сы – Башкортстан Башлыгы Хакимиятеннән, 6442се – Русия Президенты Хакимия­теннән, 131е – Дәүләт думасыннан, 486сы – ил Хөкүмәте Аппаратыннан, 5778е почта аша, кулдан һәм электрон почта белән башка чыганаклардан алынган. 2024 мөрәҗәгать Баш­корт­стан Хөкүмәте Аппаратында контрольгә куелган. Янә килеп, югары дәрәҗәле органнардан гражданнар мөрәҗә­гатьләре белән эш турында мәгълүмат сорап 632 запрос килгән.

Гражданнарны күпчелек нинди мәсьәләләр борчый соң? Республика Хөкүмәтеннән хәбәр итүләренчә, 14 мең 313 мөрәҗәгатьтә җәмгысы 14 мең 692 мәсьәлә күтәрелгән. Аларның иң зур өлеше – 5713 сорау (38,9 процент) – торак-коммуналь хуҗалык өлкәсенә кагыла. Мөрәҗәгать итүче­ләрнең 22,3 процентын (3272 сорау) икътисад үсеше мәсьәләләре борчый. 3171 сорауда (21,6 процент) социаль мәсьәләләр күтәрелгән. 2240 сорау (15,2 процент) дәүләт, җәмгыять үсеше мәсьәләләренә һәм сәясәткә кайтып кала. 296 сорау бирүче (2 процент) оборона, хәвефсезлек һәм законлылык мәсьәләләре белән кызыксынган.

Һәр өлкәдәге мәсьәләләргә аерым килгәндә исә халыкны әле һаман да иң күбе торак белән тәэмин итү һәм авария хәлендәге торактан күченү мәсьәләләре бор­чый. 934 мөрәҗә­гатьтә, ягъни бар­лык мөрәҗәгатьләрнең 6,4 про­­центында нәкъ әлеге мәсьәлә күтәрелгән. Тагын да шул, әлеге мәсьәлә белән мөрәҗәгать итүче­ләрнең күпчелеге – Бөек Ватан су­гышында катнашучылар һәм су­гыш инвалидлары, пенсионер­лар, мәҗбүри рәвештә күченеп ки­лүчеләр, запастагы офицерлар һәм авария хәлендәге торак хуҗа­лары. Яшь гаиләләрне торак бе­лән тәэмин итү, торак суб­си­дия­ләре, торак сатып алуга кредит бирү мәсьәләләре дә популяр булып кала. Кызганычка каршы, торак сатып алганда алданган гражданнар мөрәҗә­гатьләре дә алар арасында аз түгел.

Иң күп мөрәҗәгатьләр исә, һәрва­кыттагыча, Уфа (22 процент), Стәрле-тамак (7 процент), Октябрьский (3 процент), Салават (2,3 процент), Нефтекама (2 процент) шәһәрләреннән һәм Уфа (2,3 процент), Стәрлетамак (1,3 процент), Иглин (1,2 процент), Туймазы (1 процент) районнарыннан килгән.

Әйткәндәй, гражданнар мөрәҗә­гать­ләре белән эшләү турында тулы мәгъ­лүмат Башкортстан Хөкүмәтенең рәсми порталында http:/www.pravitelstvorb.ru адресы буенча урнаштырыл­ган. Анда кереп, гражданнар дәүләт власте органнары җитәкчеләренең күчмә кабул итү графиклары, Хөкүмәт Регламенты, кабул ителгән мөрәҗә­гатьләрне анализлау, бәйләнеш реквизитлары, Хөкүмәткә интернет-мөрә­җәгать итү турында тулы мәгълүмат алала.

Гражданнар мөрәҗәгатьләрендә күтәрелгән мәсьәләләрнең тиз арада, күпьяклы һәм объектив тикшерелүен һәм тиешле җавап юллануын тәэмин итү, әлеге эштә җитешсезлекләрне кичектергесез гамәлдән чыгару максатында Хөкүмәттә ныклы һәм даими контроль булдырылган. Аеруча закон бозу, коррупция, вазыйфа­дан шәхси мәнфәгатьләрдә фай­далану очраклары турында, ягъни гомум җәмгыять үсешенә кагы­лышлы мәсьәләләр шундук игъти­бар үзәгенә алына.

Мөрәҗәгатьләр буенча эшнең вакытында башкарылуын “Дело” электрон документлар әйләнеше системасындагы бүлек җитди конт­рольдә тота. Бу хакта мәгъ­лүмат атна саен Хөкүмәт Пре­мьер-министры урынбасарына җит­керелә.
Хөкүмәткә гражданнардан кил­гән мөрәҗәгатьләрне тикшерү ту­рындагы мәгълүматлар белән яр­ты ел саен, шулай ук, Ба­ш­кортстан Башлыгы таныша. Бу хакта тиешле мәгълүмат Хө­кү­­мәтнең рәсми сайтында һәм респуб­ликаның рәсми киңкүләм мәгълүмат чараларында бастырыла. Ә инде ел нәтиҗәләре Башкортстан Республикасында кеше хокуклары буенча вәкилгә җибәрелә.

Әлбәттә, һәркемнең үзен борчыган мәсьәлә буенча Хөкүмәткә, Башкортстан Башлыгына мөрәҗәгать итү мөмкинлеге булмаска да мөмкин. Шуны исәпкә алып, Хөкүмәт күрсәтмәсенә ярашлы, Премьер-министр урынбасар­ларының һәм дәүләт власте органнары җитәкчеләренең алдагы кварталга гражданнарны күчмә кабул итү графиклары расланган, бу хакта киңкүләм мәгълүмат чараларында җиткерелә.

Премьер-министр урынбасарлары гражданнарны, шулай ук, Уфа шәһәре, Тукай урамы, 46 адресы буенча Хөкү­мәт Аппаратында да кабул итә. Кабул итү графигы турында мәгълүмат http:/www.pravitelstvorb.ru рәсми сайтында урнаштырылган.

Бу җәһәттән бары тик узган елда гына Премьер-министр урынбасарлары Хөкүмәт Аппаратында 33 гражданнарны кабул итү үткәргән. Әлеге төр кабул итү барышында алар 250 гражданны тыңлаган. Янә килеп 30 күчмә кабул итү барышында Премьер-министр урынбасарларына 216 кеше мөрә­җәгать иткән.

Дәүләт власте органнары җитәк­челәре исә шушы вакыт эчендә 226 гражданнарны күчмә кабул итү үткәреп, 1526 кешенең соравына җавап биргән һәм мәсьәләне игътибар үзәгенә алган.

Күренүенчә, республика дәрә­җә­сендә гражданнар мөрәҗәгатьләре белән колачлы эш алып барыла. Шул ук вакытта урыннарда, ягъни муниципаль дәрәҗәдә халык мөрәҗәгать­ләренә игътибар артса, Хөкүмәткә ярдәм сорап хат юллаучылар саны сизелерлек азрак булыр иде дигән фикер кала. Һәрхәлдә, узган атнада Башкортстан буенча Баш федераль инспектор Андрей Чечеватов үткәргән гражданнарны кабул итү дә нәкъ шуны раслады. Барлык сигез мөрәҗәгатьтә дә диярлек урыннарда хәл ителергә тиешле мәсьәләләр күтәрелде.

Әлбәттә, моның белән халык республика власть органнарына азрак мөрәҗәгать итсен иде, дип, теләмибез. Киресенчә. Аерма фәкать шунда гына: урындагы мәсьәләләрнең урында хәл ителеп, гражданнарның республика власть органнарына күбрәк рәхмәт сүзләре белән мөрәҗәгать итүен күрәсе килә. Ахыр чиктә ил күләмендә үткә­ре­лүче барлык дәрәҗә власть орган­нарының да нәтиҗәлелеген күтәрүгә юнәлтелгән дәүләт сәясәтенең асылы да нәкъ шуңа кайтып кала бит!
Читайте нас в