“Тормышыгыз оҗмахка тиң!”

Югары дәрәҗәле кунакларны район буйлап сәфәрдә республика авыл хуҗалыгы министрының беренче урынбасары Азат Җиһан­шин, район хакимияте башлыгы Радик Ишмөхәммәтов, авыл хуҗа­лы­гы идарәсе начальнигы Нурфаиз Насретдинов, “Башкортстан казы” компанияләр төркеме директоры Рәсим Сәетбатталов озатып йөрде.

“Башкортстан казы” җәм­гыятендә кунакларны көтеп торганнар. Алар өчен биредә җитеш­терелүче продукция күргәзмәсе оештырылган иде. Анда җәм­гыятьнең компания­ләр төркеменә караучы “Серафимовская пушинка” пред­приятиесенең каурый-йон эш­лән­мәләре, каз ите һәм иттән төрле ризыклар тәкъдим ителде. Шулай ук, биредә кунаклар инкубация цехы, каз бәбкәлә­рен ­үс­­те­­рү өчен җиһазлан­ды­рылган читлекләр, яшь үрчем­не күчереп йөртү өчен автомобильне карады. Аларны аеруча каз үрчетү буенча интеграция программасы кызыксындырды. Рәсим Касыйм улы һәр сорауга җентекле җавап бирде.
Арытаба делегация Алешкино авылына юнәлде. Биредә 22 мең инә каз тотыла һәм 10 мең яшь үрчем үстерелә. Зур вольерлар алдында кызыксынучан иранлылар каз үстерү серләренә төше­нергә тырышты. Мәйданның өчтән берен — чүллек, күп өлешен таулар һәм урманнар тәшкил иткән илдә иранлылар башлыча терлекчелек белән шөгыльләнүне хуп күрә. Малны абзарларда асрыйлар. Ә биредә аларның ир­кенләп җәйләүдә йөрүен, каз­ларның яланда чирәм уртлавын күреп, алар бик гаҗәпләнде.

Безнең як табигатенең гүзәл­леген күреп, алар ихлас соклануын яшермәде. Төшке ашка “Сөярембәт” чишмә­сенә килгәч, кунаклар­ның берсе, кулларын өскә сузып: “Сез бит оҗмахта яшисез!” — диде. Алар салкын чиш­мә суыннан авыз итте, табигать кочагында фотога төште, арытаба Федоровка авылы мәчетенә намазга юлланды.

Шул ук көнне делегация Мәләвез районында урнашкан күркә итен җи­тештерү һәм эшкәртү буенча тулы цикллы заманча җиһазлан­дырылган эре предприя­тиедә — М. Гафури исе­мендәге Башкортстан кошчылык комплексында булды.

Иран делегациясе авыл хуҗалыгы буенча респуб­лика­ның ике районында гына булды һәм алар ан­да алган тәэс­соратлар буенча фи­кер туплаячак. Чит ил делега­ция­сенең мондый югары дәрәҗә­дәге рәсми сәфәре — безнең өчен сирәк күре­неш. Зур кунакларны федоровкалылар лаеклы каршылады һәм нәтиҗә­ле эшләү өчен аларга бар­лык мөмкинлекләрне дә тудырды.