Барлык яңалыклар

Син бетмәдең, син бит үлемсез!

Безнең начар гадәтләребез бик күп. Аларга каршы көрәшкән булабыз, кайсын җиңәбез дә хәтта. Ләкин Русиядә мәңге җиңелми торган бер афәт бар, ул да булса — эчкечелек. Ничек кенә көрәшмибез без аңа каршы, нинди генә ысуллар кулланмыйбыз, файдасы бик аз. 1985 елның 7 маенда СССР Министрлар советы тарафыннан кабул ителгән “Эчкечелек һәм алкоголизмны бетерү, көмешкә кайнатуны тамырыннан корыту буенча чаралар турында” Карар да изге ниятләрне күздә тоткан иде. Ләкин ул да көткән нәтиҗәне бирмәде.

Хәтердә, бу документ текстын бөтен гәзитләр бастырды. Икенче көнне үк алко­гольгә бәяләр артты һәм аны сату чикләнде. Аракыны талонга сата башладылар.

Административ чаралар чакрымнарга сузылган чиратларга, иң куркынычы — көмеш­кә кайнату артуга китерде. Илне айнытырга карар итү шәраб һәм спирт-аракы сәнәгатен авыр хәлгә куйды, халык арасында канәгатьсезлек тудырды. 1986 елда совет сәүдәсе дәүләткә — 12 миллиард, 1987 елда — 7 миллиард сум биреп бетермәде. Шәраб җитештерү һәм виноград үстерүдә югалтулар нәтиҗәсендә казнага 6,8 миллиард сум кермәде. Аннары яңа вакыт килде — спиртлы эчемлекләр белән сәүдә итүгә дәүләт монополиясе бетерелде, алкогольгә каршы кампания акрынлап юкка чыкты.

Русиялеләрнең күпчелеге (58 процент) алкогольгә каршы кампанияне нигездә уңай бәяли, шул исәптән халыкның 15 про­центы аның бик кирәкле чара икән­леген, 32 проценты идеясе дөрес, ләкин үткәрүдә хаталар булуын билгели. Респондентларның 37 проценты кампа­ниягә тискәре карашта булуын әйтә.

Әгәр дә бүген шундый кампания игълан ителә калса, русиялеләрнең 58 проценты аны хуп­лар иде, ә 36 про­цен­­тына бу идея бөтен­ләй ошамый.
Читайте нас в