+19 °С
Ачык
Гәзиткә язылуVKOKTelegram
Барлык яңалыклар

Тиңсез батырлык үрнәге

Билгеле булуынча, Бөек Ватан сугышы елларында Ленинград шәһәре халкы тиңсез батырлык күрсәтә – 900 көнлек камау, ягъни блокадага бирешмичә җиңеп чыга. Һәлак бул­ган ленинградлылар, шәһәрне саклаучы хәрбиләр Пискарево зиратына җирләнгән. Ул – сугыш елларында барлыкка килгән зиратларның дөньяда иң зурысы.

56 ел элек зиратта блокада корбаннарына багышланган мемориал ачыла. Шәһәрнең үзәгендә Марс кырларыннан (элекке Патша яланы) алып киленгән факелдан Мәңгелек ут кабызыла. Проект­ның авторлары – архитекторлар А. Васильева һәм Е. Левинсон. Зиратка кергән урындагы мәрмәр плитәгә: “1941 елның 4 сентябреннән 1944 елның 22 гыйнварына кадәр шәһәргә 107 158 авиабомба, 148 478 снаряд ташланган, 16 744 кеше һәлак булган, 33 782 кеше яраланган, ачлыктан 641 803 кеше үлгән”, – дип язылган.

Ансамбльнең үзәгендә мәһабәт бронза монумент – “Ватан-ана” скульптурасы. Стелада рельеф сыннар – траур венокларына һәм иелгән байракларга төбәлгән кешеләр. “Ватан-ана” һәм рельефларның скульпторлары – В. Исаева һәм Р. Таурит. Мемориал 26 гектар мәйданны алып тора, анда меңләгән агач, куак, кызыл рауза утыртыла. Архитектур өлеш өчен 800 вагоннан артык гранит китертелә. Плитәләрдәге истәлек текстларының авторлары – шагыйрьләр О. Берггольц һәм М. Дудин.
Читайте нас: