-10 °С
Болытлы
Гәзиткә язылуVKOKTelegramЯRus
Барлык яңалыклар

Байконурга да – 61!..

1955 елның 2 июне – планетадагы иң тәүге Байконур космодромының туган көне. Нәкъ шул көнне Генераль штаб боерыгы белән полигон штабы расланган. Төзелешнең беренче өлеше бик тиз башкарыла һәм Сергей Королев конструкцияләгән континентара “Р-7” баллистик ракетасы 1957 елның маенда ук җиһан киңлекләренә юл ала.

Байконур шуның белән дә данлыклы: биредән 1957 елда Җирнең беренче ясалма иярчене һәм 1961 елда кеше тарафыннан идарә ителүче тәүге җиһан корабы очырыла. СССР таркалгач, космодром Казахстан милкендә калды. 1994 елда Байконурны Русия Федерациясе 20 елга арендага алды, аренда срогы янә 10 елга озайтылды. 2004 елның гыйнварында исә Русия аренда вакытын 2050 елга кадәр дәвам итү турында яңа килешүне имзалады.

Җиһан корабларын озатучы корыл­маның атамасы казах телендә “Байкоңыр”, ягъни “бай үзән” буларак яңгырый. Ул Казахстанның Кызыл урда өлкәсендә урнашкан һәм 6717 квадрат километр мәйданны били. 2015 елда биредән җиһан­га 18 ракета җибәрелде. (Чагыштыру өчен: былтыр АКШтагы Канаверал Борыны космодромыннан – 17, Гвиан космик үзә­геннән (Француз Гвианасы) 12 ракета очы­рылган). Космодром һәм андагы шә­һәрчекне тоту өчен Русия бюджетыннан елына 6,16 миллиард сум акча бүленә.
Читайте нас в