+19 °С
Ачык
Гәзиткә язылуVKOKTelegram
Барлык яңалыклар
Календарьда бу көн
16 июль 2016, 02:00

Без Мәрһәм Сабитов мәктәбен үттек

Күренекле җитәкченең тууына 100 ел тулуга карата.Башкортстанга күп еллар җитәкчелек иткән Зыя Нуриев­ның һәм Зәкәрия Акназаров­ның китапларында КПССның район һәм шәһәр комитетла­рының беренче секретаре вазыйфасында фидакарь эшлә­гән шәхесләр олы хөрмәт бе­лән телгә алына. Алар арасында Мәрһәм Карам улы Сабитов та бар. 22 июль­дә аның тууына 100 ел тула.

Мәрһәм Сабитов Илеш районының Череккүл авылында туган. Хезмәт юлын 1934 елда башлангыч мәктәп укытучысы буларак башлый, тулы булмаган урта мәктәп директоры була. Бөек Ватан сугы­шының беренче көн­нә­реннән үк хәрби сафка баса һәм Бөек Җиңүгә кадәр батырларча сугыша. Илеш район Советы рәисе урынбасары булып бераз эшләгәч, Баш­кортстан өлкә партия мәктәбендә укый, аны тәмам­лаганнан соң Ярмә­кәй һәм Чишмә район Советларына җитәкчелек итә. 1954 ел­да Мәрһәм Карам улы КПСС­ның Салават район комите­тының беренче секретаре итеп сайлана. 1962-65 елларда КПСС өлкә комите­тының тө­ньяк-көнчыгыш зонадагы парторгы, Салават колхоз-совхоз идарәсенең партком секретаре була.

Мәрһәм Сабитов 1965-83 елларда Авыргазы районына җитәкчелек итте. Бу чорда колхозларның матди-техник базасы шактый ныгыды. Авыл хуҗалыгы продуктлары җи­тештерү, аларны дәүләткә тапшыру планнарын даими арттырып үтәгәне өчен район берничә тапкыр респуб­ли­каның, РСФСРның, СССР­ның күчмә Кызыл байраклары бе­лән бүләкләнде. М. Сабитов җитәкчелегендә капиталь төзе­лешләр актив алып барылды, район үзәгендә, һәр колхозда һәм пред­приятиедә күп типовой җи­тештерү, мәдә­ни-көн­күреш объектлары, мәк­тәпләр, дәваханәләр, балалар бакчалары, мәдәният йортлары, клуб­лар, торак йортлар тө­зелде, авылларга газ кертелде, юлларга асфальт җәелде, Гафури районыннан магистраль суүткәргеч сузылды. Нәкъ ул эшләгән елларда Авыргазы республикада алдынгы районнар сафына басты, аның арытаба үсүе һәм чәчәк атуы өчен нигез салынды.

Мәрһәм Сабитов төрле дәрәҗәдәге партия, совет, хуҗалык кадрларын яшьтән сайлап алуга, тәрбияләүгә, белгечләр әзерләүгә зур игътибар бирде. Ул үстергән кадрлар арытаба башка районнарга уңышлы җитәкчелек итте, республика дәрәҗәсендә җа­ваплы вазыйфалар башкарды. Аның дәверендә бригадирлар Гатфан Сафин, Николай Никитин, агроном Рәшит Диваевка Социалистик Хезмәт Герое исеме бирелде.

Алдынгы районның абруйлы җитәкчесенең үзенең дә хезмәте лаеклы бәяләнде. Ленин, Октябрь революциясе, Хезмәт Кызыл Байрагы, беренче дәрәҗә “Ватан сугышы”, “Почет билгесе” орденнары, бихисап медальләр белән бүләкләнде. КПСС өлкә комитеты әгъзасы, БАССР Югары Советы депутаты, КПССның XXIV һәм XXVI съездлары делегаты булды.

Хатыны Мәкия Салих­җан кызы белән ике бала тәрбия­ләп үстерделәр. Уллары Роберт Уфа нефть институтын, кызлары Земфира педагогия училищесын тәмамлады.

67 яшендә пенсиягә чыккан Мәрһәм Карам улы гомеренең соңгы өч елын Уфада үткәрде, районыбыз белән элемтәне өзмәде, аның уңышларын һәм проблемаларын белешеп торды. 1986 елда вафат булгач, үзенең васыяте буенча Авыр­газы районы Исмә­гыйль авыл биләмәсенең Уксынны авылы зиратында җирләнде. Еллар үткәч хатыны да, улы һәм кызы да аның янәшәсендә мәңгелек йокыга талдылар.

Авыргазылылар данлыклы шәхесне һәрчак олы ихтирам белән телгә ала. Күптән түгел район үзәгендә “түгәрәк өстәл” артында сөйләшүдә аның олуг юбилеена әзерләнү турында сүз алып бардылар. Түбәндә анда катнашкан берничә вете­ранның чыгышыннан өзекләр китерелә.
Читайте нас: