Тәрбияче — иҗади һөнәр

Нигә 27 сентябрь? Чөнки 1863 елда нәкъ шушы көнне Петербургта беренче балалар бакчасы ачыла. Аны ачучы — педагог Аделаида Семеновна Симонович. Ул вакытта бакчага 3-8 яшьлек балаларны алалар һәм алар белән төрле уеннар үткәрәләр, “Әлифба”, саннар белән таныштыралар. Аделаида Семеновна балалар бакчасын мәктәпкә әзерләү урыны дип кабул итә һәм сабый­ларның физик һәм психик үсешенә бик зур өлеш кертә. Тормыш иптәше белән бергәләп хәтта “Балалар бакчасы” дигән журнал да чыгарга башлыйлар, анда исә кечкенәләргә белем-тәрбия бирү проблемаларына багышланган язмалар басыла, авторлар үз тәҗрибәләре белән уртаклаша. Бакчалар түләүле була. Ә иң беренче түләүсез балалар бакчасы Русиядә 1868 елда барлыкка килә, 1918 елдан алар дәүләт мәгариф сис­темасына карый башлый.

Гомумән, “балалар бакчасы” дигән сүз немец теленнән алынган,”kindergarten” дигән терминны әйләнешкә бе­ренче балалар бакчасын ачучы не­мец педагогы Фридрих Фребель кертә. Статистика буенча бүген Ру­сиядә 60 меңнән артык балалар бакчасы бар һәм аларда 1200 меңнән артык кеше хезмәт сала.

Тәрбиячеләрнең бала тормышында тоткан роле турында сөйләп торасы бар микән? Миңа калса, алар — бер генә түгел, ә биш йөрәкле ке­ше­ләр. Чөнки кеше баласын ярату, бөтен вакытыңны, гомереңне аларга багышлау өчен никадәр изге күңелле булырга кирәк! Алар балаларның холкы формалашуга, сәләтләре ачылуга, тирә-якны танып белүгә, туган якны сөючеләр итеп тәрбияләүгә әйтеп бе­тергесез өлеш кертә.