-6 °С
Болытлы
Гәзиткә язылуVKOKTelegramЯRus
Барлык яңалыклар
Календарьда бу көн
8 октябрь 2016, 02:00

Сәдака өләш, калебеңне сафландыр

Гашура бәйрәме мөхәррәм аеның 10нчы көнендә (11 октябрь) билгеләнә. Мөхәррәм ае мөселман­нар өчен иң хөрмәтле айларның берсе булса, Гашура исә — мөхәр­рәм аеның иң кыйммәтле көне. Бу көнне ураза тоту һәм хәер өләшү сөн­нәт. Мөхәммәт пәйгамбәр һәм сәхабәләр бу көннәрдә ураза тот­кан.

Гашура сүзе гарәпчәдән “ун” дип тәрҗемә ителә. Бу көнне күп пәйгам­бәр­ләр бәхетсезлекләрдән, төрле афәтләрдән котылып калган.

Дин тарихыннан күренгәнчә, Гашура көненә күп төрле бәхетле очраклар туры килә. Бу көнне Аллаһы Тәгалә Җир һәм Күкне, дүрт фәрештәне бар итә; Адәм галәйһиссәләмнең тәүбәсе кабул була; Юныс пәйгамбәрне балык карыныннан коткаралар; Ибраһим пәйгамбәр туган; Гайса пәйгамбәр күккә ашкан; Муса пәйгамбәр фиргавеннән котылган; су басканнан соң Нух көймәсе Җудин тавы янында туктаган һәм башкалар.

Шигыйлар, Мөхәммәт пәйгамбәрнең оныгы Гали хәлифәнең улы Хөсәен (626-680) мөхәррәм аеның унынчы көнендә җәзалап үтерелү сәбәпле, бу вакытны матәм көннәре буларак бил­геләп уза.

Бер хәдистә язылганча, Гашура көнендә ураза тоту мөселманны үткән­нәрдәге һәм киләчәктәге гөнаһларыннан сафландыра. Ә бу көнне бирелгән сәдака бөртеге өчен дә Аллаһы Тәгалә Өхөд тавы кадәр әҗер бирер диелә.

Шуңа Гашура көнендә сәдака бирәләр, балаларны, якыннарны шатландыралар, догалар укыйлар һәм башка саваплы гамәлләр кылалар. Ә менә имам Хөсәен мәрхүм булуга бәйле рәвештә шигыйларның үз-үзләрен җәзалау йолаларының ихластан табынуга катнашы юк, ди сөнни голәмәләре.
Читайте нас в