Шагыйрьнең чыбыркысы шартларга тиеш!

Биредә алар татар, башкорт, урыс тел­ләрендә иҗат итүче яшь язучылар, шулай ук инде шактый гына тәҗ­рибәсе булган каләмдәшлә­ренең кулъязмаларын тикшерде. Елена Аллаярова, Анна Самосадкина, Гөлфирә Байбулатова, Гөл­нара Гыйлемханова, Вадим Солтанов, Евгения һәм Михаил Чуклинның иҗат җи­меш­ләренең бу көнне уңай яклары да, җитешсезлек­ләре дә күрсәтеп үтелде. Әйтик, кемгәдер шигырь язганда алмашлыклар белән артык мавыкмаска, икенчесенә фигыльләрдән рифмалар кормаска, шигырь калыпларына җавап бирүче формадан тайпылмаска дигән киңәшләр бирелде. Ничек кенә булмасын, һәркемнең эшенә тирән анализ ясалды.
— Шигырь язу ул — сурәт төшерү белән бер. Әлеге картиналар буяулардан түгел, ә сүзләрдән төзелә. Кайбер шигырьләрдә тулы бер картина күз алдыңа баса, әмма кай­берләрен берничек тә күзал­лап булмый, образлар тумый, — диде Владимир Денисов.
— Шигырьләрне укыйсың да аның мәгънәсен, югары ноктада туктаган азагын кө­тәсең. Әмма автор чыбыркысы белән селтәнеп йөри дә тәки шартлатмый, ә чыбыркы шартларга тиеш — шунсыз шигырь булмый! — диде Радик Хәким­җанов.
Мәдәният үзәгендә әдәбият сөючеләр, китапханә хезмәт­кәрләре, укытучылар, журналистлар белән берлектә “тү­гәрәк өстәл” үтте. Сүз әдәбият, шигърият турында барды. Җыелучыларның күбесен китап чыгару, ничек итеп киң аудиториягә үз әсәрләреңне ишеттерү мәсьәләсе борчый икән, бу турыда фикер алышулар булды. Кыскасы, иҗат кеше­ләре җыелган очрашу бик күңелле, файдалы үтте.
Нефтекамада каләм тиб­рәтүчеләр бик күп, алар, кайбер төбәкләрдәге кебек, таркау түгел, урыс телендә язучылар — Михаил Ковин җитәк­ләгән “Поэтический Нефтекамск”, татарча язучылар Ринат Апачев җитәкләгән “Инеш” иҗат берләшмәләренә тупланган. Шагыйрьләрнең иҗат җимеш­ләрен шәһәрдә чыгучы “Красное знамя”, “Кама тулкындары”, районның “Кама таң­нары”, “Курай” гә­зит­ләре бит­ләрендә еш күрергә була. Моннан ике ел элек нефтекамалылар шәһәр хакимияте яр­дәмендә урыс, татар, башкорт, мари язучыларының, иҗат кеше­ләренең эшләрен бергә туплап, альманах чыгарды. Уртак тырышлык белән әлеге китапның дөнья күрүе, берен­чедән, Нефтекамада иҗат кешеләренә хөрмәт зур булуы турында сөйләсә, икенчедән, биредә аларның күп булуы, дус-тату яшәве турында бәян итә.
Нефтекаманың әдәби эстафетаны кабул итүе шәһәрдә театр-концерт сезоны ачылу белән туры килде. Бу уңайдан бик матур концерт күрсәтелде. Яңавыл районы хакимияте башлыгы Илшат Вазигатов марафонның символы — Елъязма-китапны Нефтекама шәһәре хакимияте башлыгы Рәшит Дәүләтовка тапшырды.