90 яшьтә – җиңүче!

Рәшидә Шәрәфетдин кызының язмышын, искиткеч авыр һәм катлаулы булса да, бәхетсез дип тә әйтеп булмый. Сугыш яраларыннан 1948 елда гына сихәт­ләнгән үзе белән бер елгы Гамир атлы авылдашына кияүгә чыга. Бик күп яшь­тәшләренә ир күрү насыйп булмаган ул заманда 20 ел гына булса да ирле хатын булып яшәп калу бәхете тия аңа. Бүген Кыргыз-Миякәдә яшәүче Рәсимә һәм Рәмилә кызларын, Айдар улын, туган авылларында төпләнгән Зиннурын һәм Зиләсен тудырып өлгерә. Биш балага биш ай да декрет ялы күрми. Балалары белән бергә колхоз бозауларын да үстерә. Әйткәндәй, Рәшидә Тәхәвет­динованың алдынгы бозау караучы даны Биш­бүләктә әле дә онытылмаган. Унлап медальне, бер кочак Мактау грамотасын юкка гына бирмиләр. Үзен мактап язган гәзитләрне Рәши­дә апа әле дә кадерләп саклый. “Балаларымны кеше итим дип тырышып, шулай алдынгы булып киткәнмен­дер инде”, — ди Рәшидә апа, шул саргаеп беткән гәзит­ләрне барлап.
— Әйтер хәлем юк, балалар йөзгә кызыллык китер­мәде, оныкларым да үрнәкле, Гамирым гына күрә алмады бала куанычларын. Бичаракаем, әл дә яшәде — тәнендә бер исән урыны да юк иде бит! — дип, 44 яшендә гүр иясе булган ирен искә төшереп, тагын хискә бирелә ул.
Биш баламны мин
үстердем,
Жакет киярмен, диеп.
Алар миңа җавап
бирде:
“Ямап киярсең!” —
диеп…
Шаянлыгы, җор сүзлелеге белән дан тоткан Рәшидә апа һәр очракка шулай үзенең бер такмагын әйтеп куя.
— И, инәки, биш балаң биш яктан карый, хәстәрли бит инде, ә алтынчыга мин дә бар! — дип көлә аның бу сүзләреннән соң иң зур оныкасы, Кыргыз-Миякәдә шәф­кать туташы булып эшләүче Лия Нәбиуллина, картәни­ләренең шулай такмаклар чыгарырга оста булуын телгә алып.
Лия — Рәшидә апаның “алтынчы баласы” була. Ул олы кызы икенчегә кияүгә чыгып бәхетле яшәсен өчен ирен җирләүгә бер ел дигәндә туган беренче оныкасын унбер айлык чагында алып кала. Шуңа да Лия карти­нәсен “инәки” ди. Кышкы көн­нәрдә үзе янында тәр­бияләргә тырыша. Картәни­се генә, оныкасы тәрбия­сендә бераз шәбәя төшү белән тизрәк туган авылына, шунда төп йортта ялгызы дөнья көткән Зиннуры янына кайтырга ашкына.
— Анда әле ул сыерына чаклы сава, тик тора белми! — ди Лия, картәниләренең егәрлегенә сокланып.
Сокланмаслык та түгел — 90 яшендә Бишбүләктә икмәк пешерүчеләр бәйге­сендә җиңгән бит ул! Район хакимияте башлыгы Наил Гатауллин үзе тапшырган дипломны Рәшидә апа иң зур бүләк итеп саклый. Гомумән, туган районы җитәкчеләренә рәхмәтле Рәшидә апа — яшь булсалар да, булдыклылар, олыны олы итә беләләр, ди. Сугыш ветераны, яугир хатыны буларак аңа фатир да биргәннәр. Аны ул үзен караучы оныкасы Лиягә бүләк итеп яздырган.
— Җиңүнең 70 еллыгына медаль бирәчәкләр — аны Бишбүләктә аласым килә, анда безне бик нык зурлый беләләр! — ди күпне күргән, күпне кичергән Рә­шидә апа.