Кытайлылар цемент заводы төзиячәк

– Без Сибайда индустриаль парк, шул исәптән, тәүлегенә 5 мең тонна продукция җитештерүгә сәләтле заманча цемент заводы төзү белән кызыксынабыз, – диде Цзэн Айго. – Аны ел ярымда төзүне планлаштырабыз. Бу проект Кытай һәм Башкортстан арасында үзара хезмәттәшлекне ныгытуга ярдәм итәчәк.

Төбәк Башлыгы, үз чиратында, проектка барлык яклап та ярдәм күрсәтеләчәген вәгъдә итте.

– Республикада эш алып баручы инвесторлар өчен без уңайлы шартлар тудырабыз, – диде Рөстәм Хәмитов. – Бу проектны гамәлгә ашыру буенча да шулай булачак, бу эш контрольдә тотылачак. Административ каршылыклар булмаячак, проект өчен җаваплы министрлар игътибары җәлеп ителәчәк.

Төбәк җитәкчесе төзелүче предприятиенең тирә-як мохиткә зыян китермәячәген билгеләп үтте.

– Әлеге предприятиедә файдаланылачак технологияләрнең заманча булуы, аның һава һәм суларга зыян китермәве мөһим, – дип ассызыклады Рөстәм Хәмитов. – Гражданнар тирә-як мохит сафлыгы өчен борчыла һәм алар бу предприятиенең экологик яктан чиста булуын таләп итә. Мондый төрдәге технологияләрнең сездә булуын беләбез.

– Без, заманча технологияләрне кулланып, ел саен 2 миллион тонна цемент җитештерергә ниятлибез, – диде Ли Лэцзюнь.