-30 °С
Болытлы
Гәзиткә язылуVKOKTelegramЯRus
Барлык яңалыклар
Икътисад
3 сентябрь 2016, 02:00

“Башнефть” лидерлык позициясен саклый

Эшчәнлегенең төп тармакларында “Башнефть” акционерлар нефть компаниясе озак еллар базарда лидерлык позициясен саклап килә. Компания эшчән­леге төбәктәге икътисади үсешкә, социаль тотрыклылыкка уңай йогынты ясый, табигый байлыкларны рациональ куллануны тәэмин итә. Нефть чыгару тармагы катлаулы чорда икътисадны тотрыкландыруга хезмәт итә, шуңа күрә дә финанс нәтиҗәлелек һәрвакыт көнүзәк булып кала.

Күптән түгел “Башнефть” акционерлар нефть компаниясен һәм аның бүлендек пред­прия­тиеләрен үз эченә алучы “Башнефть” компанияләр төркеме, 2016 елның беренче яртысы өчен финанс отчетның халыкара стандартларына (МСФО) ярашлы әзерлән-гән берләштерелгән финанс нәтиҗә­ләрен игълан итте. Әйтергә кирәк, югары финанс нәтиҗә­ләренә тәү чиратта җитеш­терүдәге югары казанышлар аша ирешелә. Мәсәлән, 2016 елның 6 аенда “Башнефть” 10,6 миллион тонна нефть чыгарды, узган ел­ның шушы чоры белән чагыштырганда, бу күрсәткеч 10,9 процентка югарырак. То­таш ил буенча нефть чыгару үсеше 2,1 процент тәшкил итте. Шуны да билге­ләп үтәргә кирәк, 2016 елның беренче яртысында мотор ягулыгы Евро-5 стандартына ярашлы җитеш­те­релде. Әйткән­дәй, мондый төр бензин куллану авто­мобильнең төтен газларында сәламәтлек өчен зыянлы булган матдәләрне киметергә мөмкинлек бирә.

Эшкәртү тирәнлеге узган елның шушы чорында 85,2 процент булса, 2016 елның алты аенда 86,2 процентка җиткән. Бу — тармакта югары маржалы то­нык нефть продуктларын тагын да күбрәк чыгару мөмкинлеге бирүче иң яхшы күрсәткеч.

Әйтергә кирәк, агымдагы елның беренче яртысында компаниянең чиста кереме узган елдагы шул чор дәрәҗәсендә калды. Бүгенге икътисади хәл-шартларда бу гаять яхшы күр­сәт­кеч булып тора. Шул ук вакытта күп кенә компанияләрдә керемнең кимүе күзәтелде. Чагыштыру өчен шуны да бил­геләп үтәргә кирәк: 2016 елның беренче яртысында, узган елның шушы чоры белән чагыштырганда, саф табыш күләмен “Татнефть” 13,5 процентка кадәр, ә “Лукойл” компаниясе 37 процентка кадәр киметте. Ә “Башнефть” компания­сендә саннарга күз салсак, һәр өлкәдә сизелерлек үсеш күзәтелә.

Бер сүз белән әйткәндә, “Башнефть” акционерлар нефть компаниясе дөрес сайланган юлдан бара. Яхшы күрсәт­кеч­ләргә иреш­кәч, компаниянең финанс-икътисади иминлеге республикадагы социаль өлкәгә уңай йогынты ясый.

Халык хуҗалыгындагы кайсы гына тар­мак­ны алсак та, аның үсешендә ком­пания­нең мө­һим өлеше бар. Бүген алар­ның бер­ничәсенә генә тукталып үтәсе килә. Алар 30 меңгә якын хезмәткәрне эш белән тәэмин итеп кенә калмый, ә арытаба да подрядчы оешмалар аша республикада яшәүче­ләрне эшле итә. Гомумән, ком­па­ниядәге кадрлар иң кыйммәтле актив дип билгеләнә. Аларны эш белән тәэмин итү белән беррәттән, хезмәт­кәрләр турында даими хәс­тәрлек кү­релә. Лаеклы һәм хәвефсез эш шартлары тудырыла, чөнки ком­паниянең бизнестагы уңыш нигезе, биредә эшләүчеләргә бәйле. Бу — бер. Икен­чедән, алар республика бюд­жетының 20 процентын тулыландыра. Узган ел нәти­җәләренә күз салсак, бу сан 20,2 миллиард сум тәшкил итте.

Өченчедән, акционер буларак, республикага дивидендлар түли. 2015 ел нәти­җәләре буенча бюджет исәбенә 7,2 миллиард сум акча күчерелгән.

Дүртенчедән, компания республикадагы хәйрия проектларының иң зур спонсоры булып тора. Социаль өлкәгә ел саен 1,5 миллиард сумга якын акча күчерелә.

Болардан тыш, республикада спортны үстерүгә керткән өлеше бәяләп бетергесез. Спорт һәрвакыт зур чыгымнар таләп итә. “Башнефть” исә бу өлкәдәге һәр мөһим башлангычны яклап чыга. Атап әйткәндә, республикада хоккей үсешенә ел саен 2,5 миллиард сум акча күчерелә. Бу акчалар “Салават Юлаев” (континенталь хоккей лигасы), “Торос” (югары хоккей лигасы), “Толпар” (яшьләр хоккей лигасы), “Агыйдел” (хатын-кызлар лигасы), “Батыр” (яшьләр хоккей лигасы) һәм балалар хоккее өчен мәктәпләр карамагына кү­черелә.

Гомумән алганда, “Башнефть” ком­пания­сенең республика икътисадындагы һәм социаль өлкәне үстерүдәге роле елдан-ел үсә бара.
Читайте нас в