-18 °С
Болытлы
Гәзиткә язылуVKOKTikTokINSTAGRAM
Барлык яңалыклар
Икътисад
25 июнь 2021, 10:55

Кыйгылылар яңа заводлы булды

Районның юл ремонтлау-төзү идарәсе эшчәнлеге заманча технологияләргә нигезләнгән.

Районның юл ремонтлау-төзү идарәсе эшчәнлеге заманча технологияләргә нигезләнгән.

“Башкиравтодор” ачык акционерлар җәмгыяте – республикада тотрыклы эшләүче эре предприятиеләрнең берсе. Заман җилләренә бирешмичә, елдан-ел уңышлырак эшләүче аның структурасындагы коллективлар турында сөйләгәндә, Кыйгы юл ремонтлау-төзү идарәсен дә хаклы рәвештә телгә алабыз.

Районның юл хезмәте уңганнары бүгенге көндә юлларның сыйфатын яхшырту буенча колачлы эш алып бара. Трассалар һәм авыл юллары яңартылу, төзекләндерелү нәтиҗәсен­дә халыкның яшәү шартлары яхшыруын күрәбез.
Кыйгы юл ремонтлау-төзү идарәсе карамагында 295,35 километр юл бар, шу­ның 137,25 километры – республика әһәмиятендәге, 158,1 километры муниципальара юллар.
Былтыр автомобиль юлларын карап тоту буенча территориаль заказ 100 процентка үтәлгән. Бүгенге көндә юллар салу, аларны төзек тоту, ремонтлау өчен предприятиенең куәтле үз техника паркы бар. Биредә техниканы даими яңартырга тырышалар. Соңгы елларда “КамАЗ” йөк машинасы, “ДМ-14” автогрейдеры, МТЗ-82 тракторы алганнар.
Коллективта 68 кеше эшли. Идарә­дә кадрлар агымы күзәтелми. Алар – югары квалификацияле бел­гечләр, күпләре ике-өч дистә елдан артык гомерен юл төзелешенә багышлаган.
Хезмәт алдынгылары – эретеп ябыштыручы Фәнил Ишбулдин, грейдер машинисты Ралис Гарипов, машинист Фәнис Каюмов, водительләр Фәнил Мөхәммәтдинов һәм Ринат Гайнанов. Яшьләр дә сынатмый. Хезмәт­кәр­ләрнең уртача яше – 35-40. Коллектив махсус һөнәрле яшь белгечләр белән тулылана.
Оешма нәтиҗәле эшләү максатында күп тырышлык сала. Шунысы сөен­дерә: элекке чор белән чагыштырганда, бер километр юлны тәртиптә тотуга бүлеп бирелгән акча күләме хәзер күп­кә арткан. Шуның нәтиҗәсен­дә быел биредә шактый эш башкарыл­ган.
Кыйгы районы өчен бу ел бик уңыш­лы, чөнки анда яңа техноло­гияләргә нигезләнеп GLB-2000 ТТМ асфальт-бетон заводы эшли башлады. Яңа завод Дүшәнбикә авылыннан ерак түгел – “Бөре – Тастүбә – Сатка” автомобиль юлының 229нчы километрында урнашкан. Ул рекордлы кыска вакыт – 5 ай эчендә төзелгән һәм төрле асфальт-бетон катнашмалары чыгарырга мөмкинлек бирүче иң заманча корылмалар белән җиһаз­ландырылган. Предприятиенең җитеш­терүчәнлеге сәгатенә 160 тонна асфальт-бетон катнашмасы, ә егәрлелеге – 500 киловатт. Завод заманча, иң соңгы стандартлар буенча эшләячәк. Аны эшләтеп җибәрү Башкортстанда тагын да хәвефсезрәк юллар салынуга булышлык итәчәк. Заводның төп өстен­леге – эш процесслары тулысынча компьютерлаштырылган. Автоматлаштырылган предприятие төзеле­ше­нә инвести­цияләр 105 миллион сум чамасы тәшкил иткән. Ун яңа эш урыны булдырылган.
– Яңа заводта эшләячәк хезмәт­кәрләр өчен махсус укулар оештырылды, – ди җитештерү-техник инженеры Илгизәр Мөхетдинов.
– Асфальт катнаштыру җайлан­ма­сы республиканың төньяк-көнчыгыш тө­бәгендә урнашкан филиаллар өчен асфальт-бетон катнашмасы җитеште­рү өчен тө­гаенләнә. “Бөре – Тастүбә – Сатка” автомобиль юлын реконструк­ция­ләү өчен дә асфальт-бетон катнашмасы җитештерү планлаштырыла, – диде идарә начальнигы Шамил Зарипов.
Яңа асфальт-бетон заводы ачылу – “Башкиравтодор” предприятиесе өчен күптән көтелгән вакыйга. Шундый ук завод Стәрлетамакта эшли һәм ул үзенең нәтиҗәлелеген раслаган. Чөнки мондый дәрәҗәдәге завод барлык маркадагы һәм типтагы асфальт-бетон катнашмасы чыгара ала.
Биредә материалларны җылыту һәм киптерү дизель ягулыгында да, газда да эшләүче катнаш горелка ярдәмендә тормышка ашырыла. Шушында ук җитештерү-лаборатория бинасы һәм модуль тибындагы гараж төзү планлаштырылган.
Югары казанышларга ирешү өчен предприятиегә алдынгы карашлы шәхес җитәкчелек итүе, коллективның бердәм булуы мөһим роль уйный.
Юл ремонтлаучылар һәм төзүчеләр һәрвакыт киеренке хезмәттә. Эш нәти­җәләре дә күз алдында. Автомобиль йөртүчеләрнең, җәяүлеләрнең канәгать булуы – юл эшчеләренең төп хезмәт нәти­җәсе.

Элина ФӘЙЗУЛЛИНА.