Хезмәт чәме белән!

Юл хуҗалыгы хезмәткәрләренең эше катлаулы һәм җаваплы. Әлеге тармак алдына ел саен киң колачлы бурычлар куела һәм Благовар юл ремонтлау-төзү идарәсе аларны уңышлы үтәп килә. Сыйфатлы юллар салу, гамәлдәгеләрен ремонтлап тору – республикабызны күркәмләндерүдән тыш, транспорт чыгымнарын да киметү дигән сүз. Алар моны дөрес аңлап, төбәгебезне заман таләпләренә җавап бирүче автомобиль юллары белән тәэмин итүдә көчтән килгәннең барысын да эшләргә тырышалар. Киң, тигез һәм такыр юлларның, асфальт җәелгән яңа урамнарның артуы – моның ачык дәлиле.

Районның бу тармак уңган­нары бүгенге көндә юлларның сыйфатын яхшырту буенча планлы эш алып бара. Трассалар һәм авыл юллары яңар­тылу һәм төзекләндерелү нәтиҗәсендә халыкның яшәү шартлары яхшыра.
– Җәйге чорда исә район эчендә генә түгел, читтә дә юллар төзибез, төзекләндерә­без. Быел язга чыгу белән эшкә керештек. Муниципаль әһәмият­тәге юлларны карап тотабыз, Языково авылында бик күп урамнарга ремонт эшләдек. “СН-Продукт” оешмасы мәйданында зур күләмле эшләр башкардык. Каргалы, Иске Күчәрбай авылларында юлларны ремонтладык, – ди идарә җитәкчесе Рәшит Мөхәм­мәтҗанов.
– Юлларны төзүдә һәм төзекләндерүдә, күләмнән тыш, сыйфат та мөһим. Аңлашыла, асфальт түшәлгән йөзләрчә чакрым юллар озак еллар хез­мәт итәр­гә тиеш. Бу эшкә тү­гел­гән акча, көч әрәмгә китәргә тиеш түгел. Иң мөһиме – төзек юллардан йөрүчеләр канәгать булсын! – ди җи­тештерү-тех­ник инженер Ольга Барабанова
Благовар районының юл ремонтлау-төзү идарәсендә сыйфатка өстенлек бирәләр. Бу максатка бердәм һәм тату коллектив югары техноло­гияләр ярдәмендә ирешә. Биредә җитештерелгән ас­фальтның югары сыйфатлы булуы турында көзгедәй такыр юллар сөйли. Асфальт түшәү, юлларны төзекләндерү бик күп төзелеш материалы таләп итә. Шуңа күрә благоварлылар кышын кар чистарту, техниканы төзеклән­дерү белән генә чикләнми. Тоткарлыксыз эш­ләргә мөм­кинлек бирерлек күләмдә ком, ком-таш катнашмасы әзерләнә.
Яңа технологияләр куллану, техниканың яңартылуы, хезмәткәрләр өчен уңайлы шартлар тудыру, әлбәттә, эш күләмнәренә йогынты ясый. Идарәнең матди-техник базасы даими ныгытылып тора. Техника төзек булганда гына сыйфатлы юллар төзергә, кышын карны шундук тазартырга мөмкин. Благовар районының юл ремонтлау-төзү идарәсе бу юнәлештә дә күпләргә үрнәк була ала. Соңгы елларда предприятиенең техник паркы яңарыш кичерә. Техника даими яңартылып тора, грейдерлар, җиһазлар да иске түгел. Бу юнәлештә “Башкиравтодор” предприятиесе зур хәстәрлек күрә. Аңлашыла, сатып алу гына түгел, булганның кадерен белү дә зарур. Техниканы кышкылыкка куярга җылы биналар бүгеннән әзер. Кышын юлларны кардан чистарту техникасы да әзерлек сызыгында.
Төзү һәм юлларны ремонтлаудан тыш, аларны карап, тәртиптә тоту да төзү­челәр җаваплылыгында. Ә тиздән башланачак кыш аларның эшендә иң катлаулы чор. Юлны вакытында чистарту һәм бозлавыкка каршы ком сибү – юл төзүчеләр­нең көндәлек эшлә­ре. Аларны кайчагында ял, бәйрәм көннә­рендә дә, көндез дә, төнлә дә ашыгыч рәвештә башкарырга туры килә. Чөнки кар һәм яңгыр, билгеле бул­ганча, теләсә кайсы вакытта яварга мөмкин.
Юл хезмәткәрләренең эше җиңел түгел, ул елның теләсә кайсы вакытында физик һәм рухи киеренкелек, ныклы әзерлек таләп итә. Шуңа күрә бирегә эшкә үз һөнәренә бирелгән, кыен­лык­ларны җиңеп, табигать көйсезлек­ләре белән көрәшер­гә сәләтле чын фидакарь кешеләр килә.
Хезмәткәрләрнең эш шартларын яхшырту һәм социаль тәэмин итү буенча даими эшләр алып барыла. Идарә хезмәткәрләре заманча инвентарь һәм техника белән тәэмин ителгән, барлык эш­челәргә уңайлы кышкы һәм җәйге махсус киемнәр бирелә.
– Күренүенчә, бер көн дә тик тормыйбыз. Һәрвакыт эштәбез, алга карап яшибез. Кышкы чорда да эшле дә, ашлы да булачакбыз. Юлларны кардан чистартырга, тәртип­тә тотарга әзербез. Куәтле техника да, уңган егетләр дә һәрвакыт сафта, – ди булдыклы җитәкче.
Рәшит Рәис улы бар булмышын эшенә багышлаган, коллектив мәнфәгате белән яши. Идарәне эш белән тәэмин итү, хезмәткәрләр өчен уңайлы шартлар булдыру, алар лаеклы хезмәт хакы алсын өчен тырыша. “Халык өчен эшләргә” принцибына таянган җитәкчене коллективта кешелекле, кечелекле булганы өчен хөрмәт итәләр.
Заман шартлары яшь бел­гечләргә кырыс таләпләр куя. Кулына яңа гына диплом алучылар вакыт үтү белән бай тәҗрибәле, үз эшенең остасы булган белгечкә әверелергә тиеш. Студент кайчан тәҗрибә туплый ала соң? Эшкә тотынмыйча, неч­кәлек­ләргә ничек өйрәнсен? Бу сораулар һәр­вакытта да эш тәкъдим итүчеләрне борчып бармый. Чөнки катлаулы мәсьә­­­ләләрне бүген һәм хәзер хәл итәргә кирәк. Ә менә Рәшит Рәис улы, ки­ресенчә, яшь белгечләрне колач җәеп каршы алучы җитәкче. Яшьләр дә бик теләп килә бирегә. Әйтик, асфальт-бетончы Денис Бакиров, водитель Павел Аникин, машинист Рәдиф Галимов, юл эшчесе Вадим Үтәшев, яшь булуларына карамастан, эшкә бик җитди карыйлар.
Предприятиенең уңышлы эшләве тәҗрибәле белгечләр­дән һәм эшчеләрдән башка мөм­кин түгел. Югары сыйфат һәм нәтиҗәлелек нигезендә алар­ның белеме, осталыгы, җавап­лылыгы ята. Бердәм коллектив, яңа техника эшне сыйфат­лы итеп вакытында башкарыр­га мөмкинлек бирә.
Предприятие җитәкчесе бер төркем хезмәт алдынгыларын мактап телгә алды. Асфальт-бетончы Владимир Рудаков, во­дительләр Илдус Сәләхов, Раил Сибәгатуллин, Илгиз Имаев, механик Альфрит Байгузин, юл хезмәткәре Флюр Насретдинов үрнәкле хезмәт күрсәтә. Предприя­тиедә хезмәт салучы башка­ларның да хез­мәте югары бәһагә лаек, шулай булмаса, мондый казанышларга ирешеп булмас иде.
Рәшит Рәис улы бәйрәм уңаеннан хезмәттән бәхет тапкан коллективка, юлчыларга изге теләкләрен дә җиткерде.
– Беренче чиратта, һәм­мәсенә дә сәламәтлек телим. Иртән – эшкә киләселәре, кичен өйләренә кайтасылары килеп торсын. Шуңа күрә безнең эш күп булсын, хезмәт хакы да вакытында түләнсен. Хәвеф-хәтәр, күңелсез вакыйгалар булмасын. Безнең эш үтә җаваплы. Юлчыларны, гадәттә, авыр чакларда гына искә төшерәләр. Юлчы һөнә­рен табиблар эше белән чагыштырырга мөмкин. Авырганда да табиблар искә төшә. Буран чыгып, юлларга көрт салса, безнең турыда уйлана башлыйлар. Юл төзүченең мөһим һөнәр иясе икәнлеген җәмгыять беркайчан да онытмасын иде, – диде ул.
Үз чиратыбызда, хәстәр­лек­ле җитәкченең теләкләренә кушылып, юлчыларның җиңел булмаган эшендә яңадан-яңа казанышлар теләп калабыз. Юл төзүчеләр коллективы бердәм, булдыклы. Шуңа да план­лаштырган эшләрен үр­нәкле итеп башкарып чыгуларына шик юк. Аларга уңышлар юлдаш булсын!

Лилия ГАЛИНА.
Благовар районы.