Аскынлылар — әфарин!

Әлеге олимпиада, тарихны белүдән тыш, укучылар үзаллы тикшеренүләр алып барырга өйрәнсен дигән максаттан чыгып оештырыла. Тема киң — ХХ гасыр белән бәйле һәрнәрсәгә тикшеренү эшли аласың. Гөлназ Тимер­галиеваның эше Бөек Ватан сугышы белән бәйле. Дәү­әнисенең сөйләгәннәре буенча ул тарихка зур байкау ясый. Гөлназның тагы да бер тикшеренү эше — сәүдәгәр Шевкунов йортының тарихы. Архивтан әлеге өйнең 100 ел элек төшерелгән фотосын табып, аның тарихын өйрәнә. Бүгенгә йорт күзгә күренеп үзгәргән, хәзер анда рәссам Гөлсия Сәгыйтованың оста­ханәсе урнашкан.
Ирина Дудкина — рай­онның гыйбадәт­ханәләрен, ә Константин Распономарев үзәк китапханәне өйрәнә. Баксаң, район үзәгендә урнашкан китапханә 100 ел элек нинди булган, бүгенге көнгә кадәр шундый ук тышкы кыяфәтен саклап калган. Тик бер генә аерма — элек аның капкасы янына атлар бәйләнгән булган, ә хәзер машиналар тезелеп тора.
Укучыларның бу уңыш­лары артында укытучының фидакарь хезмәте тора. Балаларны әлеге бәйгегә әзер­ләгән өчен тарих укытучысы Фәридә Хөсниярова да мактау грамотасына лаек булган. Укытучы ел саен балаларны конкурсларда катнаштырырга тырыша, тик бу кадәр уңыш быел беренчегә елмайган.
— Укучыларым бу казанышлары белән мәктәпне, районны республика дәрә­җәсендә данлый. Балалар­ның җиңүләре белән горурланам. Алдагы тормышларында җиңүләр тагы да күбрәк булсын. Тик моның өчен аларга тагы да укырга, тырышырга кирәк, — ди Фәридә Әнгам кызы.
Чын граждан булып формалашу өчен үз илеңнең, халкыңның тарихын белү мөһим. Бөтенрусия конкурсында катнашкан егет һәм кызлар бу сүзләр белән тулысынча килешә!